CNN: Евроиттифоқ, АҚШ ва Британия урушни тугатиш режасини муҳокама қилмоқда. Украина музокараларда бевосита қатнашмаяпти

АҚШ, Евроиттифоқ ва Буюк Британия вакиллари сўнгги ҳафталар давомида мунтазам учрашув ўтказиб, Украинадаги урушни музокаралар йўли билан тўхтатиш режасини муҳокама қилмоқда. Бу ҳақда CNN бир нечта манбаларига таяниб хабар бермоқда, деб ёзади Meduza. Хусусан, телеканал суҳбатдошлари сўзларига кўра, Италия режаси муҳокама қилинмоқда.

Украина бу муҳокамаларда бевосита иштирок этмаяпти, бу эса АҚШ ҳукуматининг «Украинасиз Украина ҳақида ҳеч нарса гапирилмайди» мазмунидаги баёнотига зиддир. Шу билан бирга, таъкидланишича, АҚШ маълум бир режани талаб қилиб туриб олиб Украинага босим ўтказмайди ва уни Россия билан музокараларга ундамайди.

Гап тинч йўл билан тартибга солиш режасининг тахминий параметрларини аниқлаш ва уни кейинчалик муҳокама қилиш учун Украинага таклиф қилиш ҳақида бормоқда, деб ёзади CNN. Бироқ телеканал манбалари Украина ўз ҳудудларидан воз кечишини кўзда тутадиган қандайдир келишувларга тайёрлигига шубҳа билдирди. Айни вақтда CNN’нинг икки манбаси АҚШ аслида Италиянинг Қрим ва Донбасснинг тўлиқ мухториятини назарда тутувчи режасини қўллаб-қувватламаслигини айтган.

АҚШ ва унинг иттифоқчилари олиб бораётган муҳокама музокараларга олиб келиш-олиб келмаслиги ҳозирча номаълум. CNN қайд этишича, АҚШ ҳукумати ҳозирча низони дипломатик йўл билан ҳал қилишнинг реал истиқболларини кўрмаяпти. Украина ва Россия ҳам жиддий музокараларга кўп қизиқиш билдирмаяпти.

Эслатиб ўтамиз, май ойида Италия ҳукумати Украинадаги урушни тугатиш имконини берувчи режани тайёрлаган эди.

Тинч йўл билан тартибга солиш жараёнини Италия тўртта босқичда амалга оширишни таклиф қилмоқда:

• Биринчи босқич — ўт очишни тўхтатиб, фронт чизиғидан қўшинларни олиб кетиш.
• Иккинчи босқич — Украинанинг НАТОга қўшилмаслиги кафолатланган ҳолда, Евроиттифоққа аъзо бўлиши (бир қатор қўшимча шартлар ва мажбуриятлар билан).
• Учинчи босқич — Қрим ва Донбасс бўйича Украина ва Россия ўртасидаги икки томонлама келишув. Италия режаси «баҳсли ҳудудлар» тўлиқ мухториятга эга бўлишини назарда тутади, шу жумладан, ўз хавфсизлигини таъминлаш соҳасида, аммо айни вақтда Украина суверенитети сақланиб қолади.
• Тўртинчи босқич — Европада тинчлик ва хавфсизлик ҳақида кўп томонлама битим тузиш.