Россия разведкаси 19 март куни Франция томони Украинага жўнатиш учун 2000 нафар аскардан иборат ҳарбий контингент тайёрлаётгани ҳақида хабар берди. Бу ҳақда “ТАСС” нашри маълум қилди.
Россия ташқи разведка хизмати раҳбари Сергей Наришкинга кўра, Франция раҳбарияти мамлакат аҳолиси ва француз армияси генераллари билдирган хавотирларга бепарволик қилиб, Украинага жўнатиш учун 2000 нафар аскардан иборат ҳарбий контингентни шай ҳолатга келтирмоқда. Ушбу ҳарбий қисм яқин орада фронтга жўнатилиши режалаштирилган.
“Бу контингент Россия қуролли кучларининг ҳужумлари учун қонуний устувор нишонга айланади. Бу рус дунёсига қилич билан келган барча французларнинг тақдирига дахлдорликни англатади”, — деган Россия ташқи разведка хизмати раҳбари Сергей Наришкин.
Аввалроқ Парижда бўлиб ўтган Украина масаласидаги конференциядан сўнг Франция президенти Эммануэл Макрон Украинадаги махсус ҳарбий операция зонасига Ғарб қуруқлик қўшинларини юбориш эҳтимоли ҳақида маълум қилган эди. У, шунингдек, Ғарб давлатлари Россиянинг ушбу можарода ғалаба қозонишига йўл қўймаслик учун керак бўлган нарсани қилишларини маълум қилган.
Россия разведкаси маълум қилишича, Франция масъуллари бундай катта ҳарбий қисмни шарқий фронтга жўнатиш ва унинг кучидан самарали фойдалана олиш борасида хавотир билдирган. Париж расмийлари қисм Украинага етиб борибоқ Россия диққат-эътибори марказида бўлишини маълум қилган.
Изоҳ (0)