Исроил Эрон ва Сурия билан боғлиқ масалалар бўйича Россия билан махфий музокаралар ўтказди. Бу ҳақда Anadolu хабар берди.
Исроилнинг KAN давлат телеканали маълумотларига кўра, Тель-Авив Эрон ва Сурия масаласини дипломатик йўл билан ҳал қилиш мақсадида Россиянинг юқори мартабали амалдорлари билан алоқаларни давом эттирмоқда.
Қайд этилишича, Исроил ва Теҳрон ўртасида ўт очишни тўхтатиш режими эълон қилинганидан бир ҳафта ўтгач, яҳудий давлати Москва билан алоқа ўрнатган. Бу Россиянинг икки давлат ўртасида воситачи бўлиш таклифидан кейин содир бўлмоқда. Хабарда музокаралар мазмуни ҳақида батафсил маълумот берилмаган.
Шу билан бирга, Исроил АҚШ билан Эрон масаласида келишувга эришмоқчи экани айтилган. Бош вазир Биньямин Нетаньяху келаси ҳафта Вашингтонга ташрифи чоғида Дональд Трамп билан бу масалани муҳокама қилмоқчи экани билдирилган. Айтилишича, Исроил томони Эрон бўйича аввалроқ Ливан билан эришилган келишувга ўхшаш асосий тамойилларни белгилаб олмоқчи.
Исроилнинг Эронга қарши 13 июнда бошланган ҳужумлари 24 июнда Трамп ўт очишни тўхтатиш ҳақида эълон қилганидан кейин якунланганди. Ушбу сулҳдан сўнг Исроилда Сурия билан музокаралар олиб бориш истаги пайдо бўлган.
Изоҳ (0)