29 октябрь, якшанба куни Доғистон аэропортидаги тартибсизликлардан сўнг Исроил ташқи ишлар вазирлиги, шунингдек, мамлакат бош вазири Биньямин Нетаньяхунинг идораси Россия ҳукуматини Россия ҳудудидаги яҳудийлар ва исроилликларни ҳимоя қилиш чораларини кўришга чақирди.
“Исроил Россия ҳуқуқ-тартибот идораларидан қаерда бўлишидан қатъи назар, барча Исроил фуқаролари ва яҳудийларининг хавфсизлигини ҳимоя қилишини ҳамда яҳудийлар ва исроилликларга қарши қаратилган тартибсизликлар ва ёввойиликларга қарши қатъий ҳаракат қилишини кутади”, — дейилади қўшма баёнотда.
Қайд этилишича, Исроилнинг Москвадаги элчихонаси яҳудийлар ва исроилликларнинг хавфсизлигини таъминлаш масаласида Россия расмийлари билан яқиндан ҳамкорлик қилади. Ҳужжатда айтилишича, Исроил давлати бутун дунё бўйлаб Исроил фуқаролари ва яҳудийларига зарар етказиш уринишларига катта ташвиш билан қарамоқда.
Махачқалъа аэропортидаги тартибсизликлар
29 октябрь куни Федерал ҳаво транспорти агентлиги “номаълум шахсларнинг платформага кириши сабабли” Махачқалъа аэропорти учадиган ва қўнадиган рейсларга хизмат кўрсатиш учун вақтинча ёпилганини маълум қилди. Махачқалъага қўниши керак бўлган самолётлар муқобил аэродромларга йўналтирилди.
Русийзабон Telegram каналларида Фаластин байроқларини кўтарган оломон Махачқалъа аэропортига бостириб кираётгани акс этган фото ва видеоларни тарқатди.
ОАВ маълумотларига кўра, 29 октябрь куни кечқурун Тель-Авивдан Red Wings авиакомпаниясининг мунтазам рейси келишидан сал олдин аэропорт ёнига бир неча юз киши йиғилган. Оломон аэропортдан чиқаётган машиналарни тўхтатиб, рейсда келган яҳудийларни топиш учун одамларнинг паспортларини текширишга киришган.
Намойишчиларнинг бир қисми учиш-қўниш йўлагига югуриб, Тель-Авивдан келган самолётга чиқишга уринган. Воқеа жойига етиб келган полициячилар вазиятни назорат қила олмаган. Россия Тергов қўмитасининг Доғистон бўйича тергов бошқармаси оммавий тартибсизликлар моддаси бўйича жиноий иш қўзғатди. Россияда ушбу жиноят 8 йилдан 15 йилгача бўлган муддатга озодликдан маҳрум қилиш билан жазоланади. Тартибсизликларда 60 киши ҳибсга олингани хабар берилди.
Изоҳ (0)