Исроил ҳаво кучлари 29 март тонгида Суриянинг Ҳалаб шаҳри яқинидаги объектларга ҳужум уюштирди. Бу ҳақда CNN нашри хабар берди.
Хабарда айтилишича, ҳужум оқибатида тинч аҳоли ва ҳарбий хизматчилар орасида қурбонлар бўлган. Жароҳатланганлар яқин атрофдаги касалхоналарга жойлаштирилган.
SANA агентлиги хабар беришича, Исроил ҳарбий самолётлари маҳаллий вақт билан соат 01:45 атрофида Ҳалаб жануби-шарқидаги Атрия йўналишидан ҳужум бошлаган. Турар жой иншоотлари, кузатув майоқлари ва давлат муассасалари нишонга олинган.
Бир қанча нашрлар ҳужум юзасидан Исроилдан изоҳ сўраган. Тель-Авив расмийлари ҳолат юзасидан муносабат билдирмаган.
7 октябрда Исроил ва ҲАМАС кескинлиги бошланиши ортидан, Тель-Авив ҳукумати Сурия ҳудудидаги қаршилик фронти нуқталарига ҳам ҳужумлар ташкил этди. Ҳужумлар, асосан, Жўлан тепалиги ортидаги Сурия ҳудудлари, пойтахт Дамашқ атрофидаги ҳарбий иншоотларга қаратилган эди.
Изоҳ (0)