«Ҳафтанинг ҳар жумасини туризм куни деб белгиладик». Туризм салоҳияти пастлиги сабаб ишдан олинган Ургут ҳокими президент танқидидан кейинги хулосалари ҳақида

Кеча президент Шавкат Мирзиёев раислигида ички ва ташқи туризм салоҳиятини янада ошириш чора-тадбирлари юзасидан видеоселектор йиғилиши бўлиб ўтди. Йиғилишда бир неча ҳокимлар билан бирга Самарқанд вилоятининг Ургут тумани ҳокими ҳам ишдан олиниб, ўзгариш қилиши учун уч ой синов муддати берилди. «Дарё» мухбири Фарҳод Норбўтаев Ургут ҳокими Ботир Жабборов билан суҳбатлашиб, танқиддан қилинган хулоса ва муаммони бартараф этиш мақсадида қилинаётган режалари ҳақида сўради.

Давлатимиз раҳбари раислигида мамлакатимизнинг ички ва ташқи туризм салоҳиятини янада ошириш чора-тадбирлари юзасидан видеоселектор йиғилиши давомида, хизмат кўрсатиш бўйича танқид остига олинган туманлар қаторидан ўрин олганимиз бизни чуқур мулоҳазага, тегишли хулосалар чиқаришга ундади. Ургут тумани Самарқанд вилоятининг салоҳияти юқори туманларидан бири бўлса-да, туризм соҳадаги ишлар етарли даражада ташкил этилмаётганини англаб етдик. Туризм хизматлари соҳасида йўл қўйилган камчиликларга барчамиз бирдек масъулмиз. Халқ фаровонлиги учун бу борадаги ишларни изчил давом эттириш ва масъуллар фаолиятини таҳлил қилиб бориш мақсадида, ҳафтанинг ҳар жума кунини туризм куни сифатида белгиладик ҳамда келгусида Халқ депутатлари Ургут туман Кенгашига ҳар чоракнинг якуни билан туман ҳудудида соҳада олиб борилаётган ишлари тўғрисида масъуллар ҳисобот бериб боради», — дейди Ботир Жабборов.

Айтилишича, Ургут тумани Зарафшон тоғ тизмаси ён бағрида жойлашганлиги ва мўътадил табиати билан ички ва ташқи туризмни ривожлантириши учун жуда қулай ҳисобланади. Шу боисдан ҳам туманининг туризм салоҳиятидан келиб чиқиб, экотуризм, зиёрат туризми ва хизмат кўрсатиш йўналишларида 11 та маҳалла туризм ҳудуди сифатида белгилаб олинган.

Бундан ташқари ҳозирги кунда ўзининг бетакрор табиат манзаралари билан хорижлик ва маҳаллий саёҳларни ўзига жалб қилиб келаётган Терсак туризм қишлоғида 25 та уй меҳмонхона фаолияти йўлга қўйилган. Шундан 5 та уй меҳмонхонаси томонидан жорий йилнинг шу кунига қадар Европа мамлакатларининг турли давлатларидан ташриф буюрган 500 нафарга яқин хорижлик меҳмонларга хизмат кўрсатилган.

Яна бир объектга эътибор қаратадиган бўлсак, ўзингизга маълумки, халқаро М-39-автомагистрал йўлининг Ургут тумани ҳудудидан ўтувчи «Тахтиқорача» довонининг бошланиш жойида «Тешиктош» объекти жойлашган. У икки улкан қўчқорнинг бир-бири билан шохлашиб туришига ўхшайди. Германиялик киноижодкорлар суратга олган машҳур «Апачи» фильми ҳудди ана шу жойларда суратга олинган. Бу жой ушбу йўлдан ўтувчи хорижий ва маҳаллий туристларнинг доимий тўхташ жойига айланган», — дейди ҳоким.

Ботир Жабборовнинг таъкидлашича, жорий йил якунига қадар Ургут туманида «Natural Dray Fruits» хусусий корхонаси томонидан тумандаги Қоратепа сув омбори ҳудудидан Экотуризмни ривожлантириш ва меҳмонхона хизмати, дам олиш масканлари ташкил этилади. Шунингдек, «Zamin travel» МЧЖ томонидан Омонқўтон маҳалласи ҳудудида жойлашган собиқ «Дўстлик» болалар соғломлаштириш оромгоҳи бино иншооти ўрнида туризм зона ва меҳмонхона ҳамда ёзги болалар оромгоҳи ташкил этилади. «Ishtixon Gold Grapes Expart» МЧЖ инвестициявий ва ижтимоий мажбуриятлар белгиланган ҳолда замонавий хусусий клиника, сиҳатгоҳ ҳамда нуронийлар масканларини ташкил этилади.

Бу туризм масканларининг очилиши хизмат кўрсатишни ривожлантиришга ўз ҳиссасини қўшади. Қолаверса, булар билан чекланиб қолмоқчи эмасмиз, Миср Араб Республикасининг Ўзбекистон Республикасидаги Фавқулодда ва мухтор элчиси Амира Фахмин бошчилигидаги делегация (Axmed Zidan investor) Ургут туманидаги тадбиркорлар билан учрашиш ва Чор-чинор маҳалласидаги тоғ тизмасида Экотуризмни ривожлантириш ва канат йўлларини қуриш лойиҳаси билан танишиш мақсадида ташриф буюришди ҳамда лойиҳани амалга ошириш механизми билан танишишди. Лойиҳа 2022—2023 йилларда уч босқичда амалга оширилади. Биринчи босқичда 100 ўринли меҳмонхона комплексини қуриш. Иккинчи босқичда 2 километр канат йўлларини қуриш ва экотуризмни ривожлантириш ва учинчи босқичда 100 ўринга мўлжалланган санатория ва даволаш муассасасини барпо этиш кўзда тутилган. Бугунги кунда ушбу лойиҳани амалга ошириш юзасидан инвесторларни жалб қилиш бўйича музокаралар олиб борилмоқда», — дейди туман ҳокими Ботир Жабборов.

Қўшимча қилинишича, мазкур лойиҳа амалга ошса жами 50 миллион долларлик тўғридан-тўғри хорижий инвестициялар киритилиши таъминланади.

Туманимиз ҳудудида туристлар учун қулайликларни кўпайтириш, хорижий инвесторларни жалб қилган ҳолда янги туристик объектларни барпо қилиш ишларни жадаллаштириш, сайёҳларнинг туманда бўлиш муддатларини узайтириш ва уларга янада сифатли хизмат кўрсатишни йўлга қўйиш орқали соҳада улкан ютуқларга эришишни олдинга асосий мақсад қилиб қўйдик», — дейди Ботир Жабборов.