2,5 километрли дор йўли, 150 метр баландликдаги осма кўприк ва ҳашаматли меҳмонхона: Зоминдаги туризм масканидан репортаж

Жиззах вилоятининг Зомин туманида узунлиги 305, баландлиги эса 150 метр бўлган, Марказий Осиёдаги ягона кўприк фойдаланишга топширилди. Бу ҳақда Ўзбекистонда фаолият юритувчи ОАВ вакиллари, мустақил журналист ва блогерлар учун ташкил этилган пресс-тур давомида маълум қилинди. Мазкур пресс-турда иштирок этган “Дарё” ижодий жамоаси Зомин тоғидаги туризм маскани ҳақида репортаж тайёрлади. 

Масъулларнинг маълумот беришича, Зомин тоғидаги туризм маскани 950 гектар майдонга эга бўлиб, ҳудудда кўприк, салкам 2,5 километрлик дор йўли, уч юлдузли меҳмонхона ва соғломлаштириш маркази жойлашган.

Зомин туристик-рекреацион зонаси ДУК директори ўринбосари  Абдуғани Авазовнинг айтишича, туризм маскани президентнинг 2021 йил 6 апрелдаги “Зомин туристик-рекреацион зонасини ва халқаро умуммавсумий курортини ташкил этиш чора-тадбирлари тўғрисида”ги фармони ижроси ҳисобланади.

Ушбу масканнинг бош режаси туризмни ривожлантиришда етакчи давлат бўлган Австриянинг лойиҳа компанияси томонидан ишлаб чиқилган бўлиб, масканда учта уч юлдузли 600 ўринли меҳмонхона, Швейцария компанияси технологияси асосида барпо этилган 36 та кабинали осма дор йўли, 360 ўринли автотураргоҳ, 100 ўринли соғломлаштириш маркази, 140 ўринли ресторан, 40 ўринли кафе ва ёшар учун Бахт уйи мавжуд. Қолаверса, узунлиги 305, бўйи 150 метр бўлган Марказий Осиёдаги ягона кўприк ҳам бор, — дейди Зомин туристик-рекреацион зона ДУК директори ўринбосари Абдуғани Авазов. 

Масъулнинг аниқлаштиришича, 305 метр узунликка эга бўлган кўприкка чиқиш 12 ёшгача бўлган болалар ва 55 ёшдан юқори қариялар учун бепул, қолганлар учун эса 50 минг сўмни ташкил этади. 

Зомин туристик-рекреацион зонаси ДУК бош мутахассиси Камол Фармоновнинг билдиришича, кўприк бир вақтнинг ўзида 600 нафар кишини кўтара олади. 

Кўприк Швейцария технологияси асосида қурилган бўлиб, бирваракайига 600 нафар сайёҳни кўтара олади. Кўприк, 140 ўринли ресторан, 40 ўринли кафе ва Бахт уйи 84 миллиард сўм эвазига барпо этилган, — дейди у. 

Пресс-тур давомида аниқлаштиришимизча, ҳудуддаги меҳмонхоналарнинг стандарт хоналари икки киши учун 2 миллион 200 минг сўмни ташкил қилади.

Бу нарх ичида сайёҳларнинг уч маҳал овқатланиш харажатлари ҳам киритилган. Шунингдек, люкс хоналар эса 2 миллион 600 минг сўм ҳисобланади.