Ўзбекистонда модулли меҳмонхоналар қуриш учун ажратиладиган субсидия миқдори оширилди. Бу “2025–2026 йилларда сайёҳлар оқимини кескин кўпайтириш ва туристик хизматлар кўламини жадал кенгайтириш орқали туризмнинг иқтисодиётдаги ўрни ва аҳамиятини ошириш чора-тадбирлари тўғрисида”ги президент фармонида белгиланди.
Унга кўра, 2027 йил 1 январгача тадбиркорлар томонидан модулли меҳмонхонани қуриш ва жиҳозлаш харажатларининг бир қисмини қоплаш учун камида 10 та модулдан иборат бўлган модулли меҳмонхоналар учун қуйидаги миқдорларда 1 марталик субсидия ажратилади:
- I тоифадаги модулли меҳмонхонадаги ҳар бир жой учун — 10 млн сўм;
- II тоифадаги модулли меҳмонхонадаги ҳар бир жой учун — 7 млн сўм;
- III тоифадаги модулли меҳмонхонадаги ҳар бир жой учун — 5 млн сўм.
Илгари мувофиқлик сертификати берилган янги ташкил этилган ҳамда камида 10 та модулдан иборат бўлган модулли меҳмонхона учун унинг тоифасидан қатъи назар яратилган ҳар бир жой учун 2026 йил 1 ноябргача 1 млн сўмдан субсидия ажратилиши белгиланганди.
Президентнинг янги фармонига кўра, 2028 йил 1 январгача тиббий туризм кластерларининг туризм йўналишидаги ходимлари малакасини ошириш харажатларининг бир қисми қоплаб берилади.
2030 йил 1 январгача тиббий туризм кластерларининг хизматлари халқаро туризм ва тиббиёт ярмаркалари ҳамда кўргазмаларида тарғиб қилинади. 2025 йил 1 июндан туризм соҳасига оид барча давлат электрон тизим ва платформалари Миллий туризм ягона платформаси доирасида ишлаб чиқилади. 2025 йил якунига қадар Самарқанд шаҳрида “Ипак йўлида туризм” тематик офиси ташкил этилади.
Фармонга кўра, республика миқёсида ёшлар ўртасида ўтказиладиган спорт мусобақалари ғолиблари қўшимча равишда “Ўзбекистон бўйлаб саёҳат” йўлланмаси билан тақдирланиши белгиланди.
Модулли меҳмонхоналар ҳақида
Модулли меҳмонхоналар халқаро бозорда анча вақтдан бери маълум бўлган меҳмонхона туридир. Модулли меҳмонхона — бу тайёр қурилиш блок-контейнерларидан йиғилган бино-конструктор ҳисобланади. Бу қурилишнинг замонавий ва тезкор усули. Бу пойдевори бўлмаган қурилиш лойиҳаси бўлиб, каркас-модул технологиясидан фойдаланган ҳолда қурилган, уни зарур бўлганда жойидан бошқа жойга кўчириш мумкин.
Ўзбекистонда 2024 йилда “Туризм хизматлари. Модулли меҳмонхоналар. Таснифлаш тизими” миллий стандарти ишлаб чиқилган. Тоифалар рим рақами билан белгиланади ва учта I, II, ва III тоифа бўйича таснифланади. Энг юқори тоифа I (биринчи), энг паст III (учинчи) тоифа ҳисобланади.
Изоҳ (0)