Улан Батор шаҳрида 23 июнь куни “Ўзбекистон — Буюк Ипак йўли дурдонаси” мавзусида Ўзбекистон—Мўғулистон туризм форуми бўлиб ўтди, деб хабар бермоқда “Дарё” мухбири.
Форумда Ўзбекистон Туризм қўмитаси раҳбарияти, Мўғулистон ҳукумати вакиллари, икки мамлакатнинг етакчи сайёҳлик агентликлари, меҳмонхона тармоқлари, авиакомпаниялар ҳамда туризм соҳаси мутахассислари ва ОАВ вакиллари иштирок этди.
Мазкур тадбир икки давлат ўртасидаги маданий ва иқтисодий алоқаларни мустаҳкамлаш, айниқса, туризм соҳасидаги ҳамкорликни янги босқичга олиб чиқишга хизмат қилиши кўзда тутилган.
Тадбир доирасида Ўзбекистоннинг туризм салоҳиятини акс эттирувчи кенг қамровли тақдимотлар намойиш этилди. Янги сайёҳлик масканларининг яратилиши, замонавий инфратузилмалар, экологик туризм, зиёрат туризми, гастрономик йўналишлар ҳамда фестивал ва анъанавий байрамлар орқали туризмни ривожлантириш бўйича амалга оширилаётган ишлар ёритиб берилди.
Айниқса, форум иштирокчиларининг эътиборини Ўзбекистоннинг тарихий шаҳарлари — Самарқанд, Бухоро, Хива, Шаҳрисабз ва Тошкентдаги ноёб меъморий обидалар, ЮНЕСКО мероси рўйхатига киритилган қадимий масканлар, миллий ҳунармандчилик марказлари ва бошқа тарихий-маданий бойликлар тортди.
Тадбир доирасида ўтказилган “B2B” форматидаги учрашувларда Ўзбекистон ва Мўғулистоннинг 150 га яқин туризм компаниялари вакиллари иштирок этиб, ўзаро ҳамкорлик йўналишларини муҳокама қилди. Натижада икки томонлама шартномалар имзоланди, қўшма лойиҳаларни амалга ошириш бўйича дастлабки келишувларга эришилди ва сайёҳлар алмашинувини ошириш режалаштирилди.
Изоҳ (0)