Уоррен Баффет 27 июнь куни Gates жамғармаси ва 4 та оилавий хайрия ташкилотга Berkshire Hathaway акцияларининг 6 миллиард долларини хайрия қилди. Бу ҳақда CNN хабар берди.
Миллиардер деярли 20 йил олдин бойлигини улашишни бошлаганди. Ушбу сўнгги хайрия шу кунгача қилинган энг каттаси сифатида қайд этилмоқда. Тахминан 12,36 миллион Berkshire B тоифасидаги акциялар Баффетнинг ташкилотларга қилган умумий хайриясини 60 миллиард доллардан ошириб юборди.
Баффет Gates фондига 9,43 миллион, Susan Thompson Buffet жамғармасига 943 384 минг, ва унинг фарзандлари Ховард, Сюзи ва Питер томонидан бошқариладиган 3 та хайрия ташкилотининг ҳар бирига 660 366 минг улуш хайрия қилган.
Уоррен Баффет ҳали ҳам Berkshire акцияларининг 13,8 фоизига эгалик қилади. Сўнгги хайриядан олдин унинг 152 миллиард долларлик бойлиги уни дунёдаги бешинчи энг бой одамга айлантирган. У 2024 йилнинг ноябрь ойида оилавий хайрия ташкилотларига 1,14 миллиард доллар хайрия қилган эди.
Баффет ўз баёнотида Berkshire акцияларини сотиш ниятида эмаслигини таъкидлаган. Ҳозир 94 ёшда бўлган Баффет 2006 йилда ўз бойлигини тарқатишни бошлаганди. У 2024 йили ўз васиятномасини ўзгартириб, вафотидан кейин мол-мулкининг 99,5 фоизини фарзандлари назорат қиладиган хайрия жамғармасига ўтказган.
Пулни тақсимлаш учун миллиардернинг фарзандларида тахминан ўн йил вақт бўлади. Шу вақт ичида улар маблағлар қаерга кетишини бир овоздан ҳал қилиши керак. 1,05 триллион долларлик Berkshire конгломерати 200 га яқин бизнесга, жумладан Geicо автомобиль суғуртаси, BNSF темир йўли, Apple ва American Express каби ўнлаб акцияларга эгалик қилади.
Изоҳ (0)