Berkshire Hathaway раҳбари, миллиардер Уоррен Баффет камдан-кам интервью беради, аммо бир пайтлар ўзи тамомлаган Небраска-Линкольн университети битирувчилари учун истисно қилди. 90 ёшли миллиардер диплом топшириш онлайн маросимида сўзга чиқиб, 20 ёшдагиларга карьера қилиш ва муваффақиятга эришишга ёрдам берадиган тўртта маслаҳат берди. Қуйида Inc ушбу маслаҳатларни келтирди.
Иш фаолияти ҳар куни завқ бағишлайдиган жойдагина ишлаш
Бундан камига рози бўлманг. Ўзингизга ёққан компания ёки одамлар қўлида ишланг. Пулга жуда муҳтож бўлсангиз ҳам эталаб туриб жон деб борадиган ишни танланг. Бахтимга, мен шундай ишга муяссар бўлдим ва шуни айтишим мумкинки, бунга тенг келадигани йўқ. Ишингиз иш эмас, балки сиз ҳар куни орзиқиб кутадиган нарсага айланади.
Коммуникатив қобилиятни ривожлантириш
Коммуникатив кўникмаларини ривожлантириш жуда муҳим. Сиз ёзишни ва гапиришни яхши билишингиз керак. Миянгизни тўлдиринг. Ҳозир ҳаётингиздаги энг ажойиб даврни бошдан кечиряпсиз, бу ҳар куни янги билимларга эга бўлиш учун энг яхши давр, илгари бунинг имкони йўқ эди.
Кўпроқ ўқиш
Синчков ақлга эга бўлмочи бўлсангиз, ўқишдан яхшиси йўқ. Баъзида одамлар «Агар тирик ёки ўлган бирор киши билан тушлик қилмоқчи бўлсангиз, кимни танлаган бўлардингиз?» деб сўрашади. Китоб ўқиганингизда Бенжамин Франклин билан ҳам тарихдаги бошқа исталган машҳур шахслар билан ҳам тушлик қилишингиз мумкин. Бу жараён истаганча давом этиши, сиз эса бу вақт давомида олган янги ғоялардан завқланишингиз мумкин.
Муваффақиятни пул ёки шуҳрат билан ўлчамаслик
90 ёшга киргунимча жуда бойиб кетган, аммо ҳаёти омадсиз ва бахтсиз одамларни кўрдим. Ўз ишлари билан донғи кетган, лекин омадсиз кишиларни ҳам кўрдим. Лекин яқинлари муҳаббати қуршовида 70 ёшгача етиб буни бахт деб ҳисобламаган бирор кишини кўрмадим. Болаларингиз, умр йўлдошингиз, ҳамкасбларингиз — ҳаммаси 65 ёки 70 га чиққанингизда ҳам сизни яхши кўришда давом этса, муваффақиятга эришган бўласиз. Мен қобилиятлари, пули ва машҳурлиги юқори бўлган, лекин ҳаётларида муҳаббат бўлмаган кўплаб одамларни кўрдим, уларнинг ҳаётлари маъносиз эди.
Изоҳ (0)