Андижон вилоятининг Булоқбоши тумани Раиш қишлоғидан оқиб ўтувчи каналда нефть оқаётгани акс этган видеолар тарқалди. Ҳолат нефтни қайта ишлаш корхонасидаги авария сабаб юз бергани маълум бўлди.
29 июль куни ҳолат Андижон вилояти Экология, атроф-муҳитни муҳофаза қилиш ва иқлим ўзгариши бошқармаси, ҳамда мутасадди ташкилотлар билан биргаликда ўрганилганда “Саноат энергетика гуруҳи” МЧЖ томонидан нефтни қайта ишлаш натижасида авария юз бергани аниқланган.
Ушбу ҳолат тўлиқ бартараф этилди. Ҳолат бўйича “Саноат энергетика гуруҳи” МЧЖга тегишли тартибда текширув ўтказиш учун ҳужжатлар расмийлаштирилди, дейилади бошқарма хабарида.
Билдирилишича, текшириш якуни билан табиатга етказилган зарар ва таъсир чоралари бўйича қўшимча маълумот тақдим этилади.
26 июль куни Андижон вилояти Булоқбоши туманидаги Жанубий Фарғона канали кўпикка тўлиб оққанди. Ўрганишлар натижасида тикув-трикотаж фабрикаси томонидан қайта ишланган матолар учун фойдаланилган сув каналга ташлангани, оқибатда сувнинг кўриниши ва таркиби ўзгаргани маълум бўлган.
Изоҳ (0)