Баффеттга тегишли компания АҚШдаги норозилик акцияларини қўллаб-қувватлаб, иштирокчиларга ғишт етказиб берганликда гумон қилинди

АҚШдаги қурилиш материаллари ишлаб чиқарувчи Acme Brick компанияси мамлакатдаги норозилик намойишларини қўллаб-қувватлаганликда гумон қилинмоқда. Бу ҳақда Bloomberg хабар берди.

Қайд этилишича, июнь бошида ижтимоий тармоқларда компаниянинг норозилик билдираётган одамларга ғишт етказиб беришга тайёрлиги ҳақидаги хабарномалар тарқалган.

Acme Brick корхонаси Техасда жойлашган. Компанияга 1891 йилда асос солинган ва ХХ аср ўрталарига келиб ушбу корхона АҚШдаги энг йирик ғишт ишлаб чиқарувчилардан бири ҳисобланган. 2000 йилда Acme Brick’ни миллиардер Уоррен Баффеттга тегишли Berkshire Hathaway ҳолдинги харид қилган.

1 июнда Acme Brick’нинг маркетинг масалалари бўйича директори Бритт Стоукс Twitter’да компания номига шикоятлар, айбловлар эълон қилингани ҳақида гапирган. Ижтимоий тармоқдаги фойдаланувчи Acme Brick логотипи туширилган поддонлардаги ғиштлар суратини эълон қилиб, компаниянинг норозилик иштирокчилари учун Даллас шаҳри яқинидаги Фриско кўчасида атайин қолдирганини тахмин қилганди.

Стоукс буюртмани тафтиш қилиб, ғиштлар партиясининг уй эгалари ассоциацияси томонидан деворларни таъмирлаш учун етказиб берилганини аниқлаган. Ушбу маълумотни маҳаллий полиция ҳам тасдиқлаган.

https://twitter.com/FriscoPD/status/1267499426689548290

Bloomberg’нинг ёзишича, ушбу расмий ахборотларга қарамай интернетдаги миш-мишлар асло камаймаяпти. Twitter’да бу каби мазмундаги хабарлар кўпайиб бормоқда, кейинчалик Facebook, YouTube, TikTok’да ҳамда бир қатор оммавий ахборот воситаларида ҳам ғиштлар ҳақидаги хабарлар тарқалган. 2 июнда Fox News телеканали норозилик намойишлари ўтказиладиган жойларда сирли равишда пайдо бўлаётган ғиштлар уюми ҳақидаги видеолавҳани эфитга берган.

The Intercept нашрининг ёзишича, 3 июнда Оқ уй Twitter-аккаунтида «Антифа» ҳаракати ва «профессионал анархистлар»нинг норозилик намойишлари вақтида зўравонликни кучайтириш мақсадида одамларга ғиштлар ҳамда қуроллар етказиб берилаётгани ҳақидаги матн ва видео юкланган. Орадан маълум вақт ўтгач кўришлар сони бир миллиондан ошган ушбу пост аккаунтдан ўчириб ташланган.

Фитна назарияси тарафдори бўлган америкалик журналист Алекс Жонс 2 июнь куни ўз радио-шоусида ушбу воқеаларга Билл Гейтснинг алоқаси борлигини маълум қилган. Унинг фикрича, конспирологлар Гейтсни коронавирусга қарши вакцинация қилиш йўли билан одамларга чип ўрнатишга уринаётганликда айблаган.

«Хонимлар ва жаноблар, биз АҚШдаги 20 дан зиёд шаҳарларга ким ғишт етказиб бераётганини аниқладик. Бу Acme Brick корхонаси, у Berkshire Hathaway ва Билл Гейтсга қарашли», — деган Жонс.

Гейтс Berkshire директорлар кенгаши таркибидан чиққанини 2020 йилнинг март ойида эълон қилганди.

Ўз навбатида Berkshire Hathaway вакиллари Bloomberg’нинг бу борадаги сўровига жавоб қайтармаган. Acme Brick эса айбловларни инкор этмоқда.

«Acme Brick қурилиш ишлари билан шуғулланади ва бузиш ишларига аралашмайди», — дея баёнот берган компания ўз расмий сайтида.

Шунингдек, компания зўравонликка тарғибот қилиш мақсадида ҳеч қандай ишни амалга оширмаганини қайд этган. Шунингдек, баёнотда Баффетт ҳам, Гейтс ҳам, Berkshire ҳолдинги директорлар кенгашидаги ҳеч бир инсон ғиштларда ноқонуний фойдаланиш ишига алоқадор эмаслиги айтиб ўтган.

АҚШда ирқчилик ва ҳуқуқ-тартибот идораларига қарши бошланган норозилик намойишлари икки ҳафтадан буён давом этмоқда. Намойишларнинг бошланишига афроамерикалик Жорж Флойднинг Миннесота штатидаги Миннеаполис шаҳрида полициячилар томонидан қийноққа солиниши ва касалхонада вафот этиши сабаб бўлган. Ўнлаб шаҳарларда намойишлар кетидан кўчалардаги тартибсизликлар, дўконларнинг ўмариб кетилиши, вандализм ва биноларга ўт қўйиш ҳолатлари кузатилди.