Колумбия собиқ президенти Альваро Урибе 29 июль куни судда гувоҳга босим ўтказганликда айбдор деб топилди. Богота суди президентнинг қамоқда бўлган собиқ ҳарбийни ёлғон гувоҳлик беришга ундаганини аниқлади. Бу ҳақда Deutsche Welle хабар берди.
Собиқ президент Урибе 2002–2010 йилларда Колумбияни бошқарган. Суднинг билдиришича, у ўзининг ҳарбий гуруҳлар билан алоқадорлиги бўйича олиб борилган терговда собиқ парамилитар Жуан Гуиллермо Монсалвени унга қарши кўрсатма бермасликка мажбурлаган.
Бу ҳолат Колумбия тарихида илк бор бўлиб, шу пайтгача собиқ президент ҳеч бир жиноят ишида айбланмаган эди. Тахмин қилинишича, Урибе 12 йилгача қамоқ жазосига ҳукм қилиниши мумкин.
Воқеа қандай содир бўлган?
Жиноят иши 2012 йилда бошланган. Ўшанда консерватив сиёсатчи Урибе чап қанотдаги сенатор Иван Сепедани ноқонуний қуролли гуруҳлар билан алоқадорликда айблаган. Бироқ Олий суд Сепедани эмас, Урибенинг ўзини тергов қилишга қарор қилган.
2018 йилда расмий тергов бошланиб, 2019 йилда Богота ва Меделинда минглаб одамлар Урибега нисбатан жиноий иш очилганига қарши намойиш қилганди.
Бироқ иш жорий йил — 2024 йилда янгитдан қайта очилган. Бу президент Густаво Петро (Колумбия тарихидаги биринчи чап қанотдаги президент) томонидан Луз Камарго бош прокурор этиб тайинланганидан кейин юз берган. Петронинг ўзи собиқ партизан ва Урибенинг сиёсий рақиби бўлган.
Урибенинг ўтмиши ва обрўси
Урибе Колумбияда узоқ йиллар давом этган фуқаролар уруши даврида ҳокимиятда бўлган. У чап қанотдаги FARC исёнчи гуруҳига ва гиёҳванд картелларга қарши кескин сиёсати билан танилган. Унинг ўрнига президент бўлган собиқ иттифоқчиси Хуан Мануэл Сантос 2016 йилда FARC билан тинчлик келишувини имзолаган, бу эса Урибе томонидан “хиёнат” сифатида қабул қилинган.
Ҳозир ҳам Урибе Колумбияда консервативлар орасида машҳур сиёсатчи бўлиб қолмоқда. Айниқса, президент Петро ҳукуматининг қуролли гуруҳлар билан олиб борган тинчлик ҳаракатлари муваффақиятсизликка учраганидан сўнг, Урибенинг позицияси яна кучайган.
Урибега нисбатан бошқа жиддий тергов ишлари ҳам очилган. Жумладан, у 1997 йилда Антиохия губернатори бўлганида содир бўлган қишлоқ аҳолиси қирғини бўйича тергов қилинмоқда. Шунингдек, Аргентинада Урибе устидан 6 мингдан ортиқ тинч аҳоли ҳарбийлар томонидан ўлдирилгани ва бедарак йўқолгани бўйича шикоят қилинган. Урибе ўзига қарши терговларни “сиёсий қасос” дея баҳоламоқда.
АҚШ давлат котиби Марко Рубио эса суд ҳукмини танқид қилмоқда. Унинг фикрича, Урибенинг ягона айби – юртини ҳимоя қилиш ва унга содиқлик билан хизмат қилиш бўлган.
“Колумбия суд тизимининг радикал судьялар томонидан қурол сифатида ишлатилаётгани хавотирли”, деган Рубио.
Изоҳ (0)