АҚШда 32 йил қамоқда ноҳақ ўтирган эркак оқланди 

АҚШнинг Мериленд штатида ўзи содир этмаган иккита қотиллик учун 32 йил қамоқда ўтирган Жон Ҳафингтон оқланди. Бу ҳақда Associated Press хабар берди.

Эркак уни ноҳақ ҳибсга олганлар устидан судга мурожаат қилмоқчи. Бироқ жавобгар сифатида кўрсатилган беш кишидан тўрттаси аллақачон вафот этган. Ҳаффингтон 1981 йилда Мериленд штатида содир этилган иккита қотилликда айбланиб ҳибсга олинганди.

У 2023 йил январь ойида штат губернатори Ларри Ҳоган томонидан тўлиқ оқлов асосида афв этилган. Кейинчалик, ҳукумат уни ноқонуний қамоқда сақлаганлик учун 2,9 миллион доллар компенсация тўлашга қарор қилган.

Қамоқда ўтказган йилларим инсонлар билан алоқамни бузди, оила қуриш имкониятидан маҳрум қилди. Онам вафот этганида ёнида бўлолмадим. Озодликка чиққанимда эса 90 ёшдан ошган, Алцгеймер касаллигидан азият чекаётган отам билан ўтказишим мумкин бўлган қимматли вақтни йўқотдим, деган Ҳаффингтон.

62 ёшли Ҳаффингтон доимо ўзининг айбсизлигини таъкидлаб келган. У икки марта умрбод қамоқ жазосига ҳукм қилинган ва 32 йилини қамоқда ўтказган.

У “Хотира куни қотилликлари” номи билан танилган ишда икки бор судланган. Жабрланувчи Диана Беккер машинасида пичоқлаб ўлдирилган, бироқ ичкарида бўлган 4 ёшли ўғли омон қолган. Беккернинг севгилиси Жозеф Хадсон отиб ўлдирилган ва жасади бир неча километр узоқликда топилган.

Кейинчалик бошқа гумонланувчи Ҳаффингтонга қарши гувоҳлик берган. Унинг ўзи ҳам биринчи даражали қотилликда айбдор деб топилиб, 27 йил қамоқ жазосини ўтаган. Прокурорлар жиноят жойида топилган сочлар Ҳаффингтонга тегишли экани ҳақидаги кейинчалик сохта экани аниқланган далилларга таянган.

Ҳаффингтон илк бор 1981 йилда апелляцияга мурожаат қилган. 1983 йилда у биринчи даражали қотилликда айбдор деб топилиб, ўлим жазосига ҳукм этилган. Бироқ кейинчалик бу ҳукм икки умрбод қамоқ жазосига алмаштирилган.