Халқаро меҳнат ташкилоти, UNICEF ва Жаҳон банки Ижтимоий ҳимоя агентлиги ташкил этилишини қўллаб-қувватлади

Халқаро меҳнат ташкилоти, UNICEF ва Жаҳон банки Ижтимоий ҳимоя агентлигининг ташкил этилишини қўллаб-қувватлаши маълум қилинди. 

Хабарга кўра, Халқаро меҳнат ташкилоти (ХМТ), БМТ Болалар жамғармаси (UNICEF) ва Жаҳон банки президент ҳузурида Миллий ижтимоий ҳимоя агентлиги ташкил этилганини олқишлайди. Бу Ўзбекистоннинг ижтимоий ҳимоя соҳасидаги кун тартибини илгари суришда ҳамда бутун ҳаётлари давомида алоҳида шахслар ва оилаларнинг камбағаллик, заифлик ва ижтимоий четланишини камайтиришга ва олдини олишга қаратилган Миллий ижтимоий ҳимоя стратегиясини, шунингдек, Ўзбекистоннинг миллий ривожланиш ва барқарор ривожланиш мақсадларини амалга оширишдаги муҳим қадам экани таъкидланган.

“ХМТ, UNICEF ва Жаҳон банки мамлакатда барчанинг манфаати йўлида ижтимоий ҳимояни ривожлантириш учун Ўзбекистон ҳукуматини бундан кейин ҳам қўллаб-қувватлашга тайёр”, — дейилади хабарда.

Ижтимоий ҳимоя миллий агентлиги ҳақида

Шавкат Мирзиёев Ўзбекистонда ҳозирги 6 та вазирликда тарқоқ бўлган ижтимоий хизматлар бирлаштирилиб, Ижтимоий ҳимоя миллий агентлиги ташкил этилишини маълум қилганди. Бугунги кунда давлат томонидан кафолатланган ижтимоий ҳимоя дастурлари 170 дан ортиқ хизматлар ва ёрдамларни қамраб олган бўлиб, ушбу хизматлар 6 та вазирлик томонидан бир-биридан тарқоқ тарзда фаолият олиб бормоқда. Аҳолига комплекс ёндашув асосида профессионал ижтимоий хизматлар кўрсатиш тизимини жорий қилиш мақсадида Ижтимоий ҳимоя миллий агентлиги ташкил этилди.

Агентликнинг асосий вазифаларидан бири оғир ижтимоий ҳолатга тушган ва тушиш хавфи бўлган аҳоли билан манзилли ишлашни ташкил қилишдан иборат бўлиб, аҳолининг 31 та тоифасига индивидуал ёндашувга мувофиқ ижтимоий хизматларни маҳалла даражасида ташкил этади.

Хусусан:

• кекса ёшдаги шахслар ва қариялар;
• ўзгалар парваришига муҳтож бўлган шахслар;
• ногиронлиги бўлган шахслар;
• кам таъминланган оилалар;
• зўравонликка учраган шахслар;
• ногирон фарзандлари бўлган оилаларга ва ота-онасининг бири ногирон бўлган болалар;
• васийликка олинган оилалар;
• етим ва чин етим болалар;
• алоҳида таълим-тарбияга муҳтож шахслар ижтимоий ёрдам ва хизматлар билан қамраб олинади.

Агентлик томонидан аҳолига қуйидаги асосий ижтимоий хизматлар ва ёрдамлар кўрсатилади:

• кам таъминланган оилаларга ҳамда меҳантга лаёқатсиз аҳолига нафақалар ва моддий ёрдамлар бериш;
• кексалар ва ногиронлиги бўлган шахслар ҳамда меҳнат фахрийлари учун санаторийлар ҳамда пансионатларда ижтимоий хизматларни ташкил этиш;
• аҳолини протез-ортопедия маҳсулотлари ва реабилитация техник воситалари билан таъминлаш;
• ногиронлиги бўлган шахсларни имтиёзли ҳамда бепул стационар даволанишини таъминлаш;
• ногиронлиги бўлган шахсларнинг якка тартибдаги реабилитация дастурларини ишлаб чиқиш;
• оғир ижтимоий оилалар билан ишлаш;
• руҳий-ижтимоий хизматларни кўрсатиш;
• тазйиқ ва вояга етмаган болаларга ижтимоий-ҳуқуқий ёрдам кўрсатиш;
• етим ва чин етимлар билан манзилли ишлаш;
• эхтиёжманд аҳоли қатламига тиббий, психологик ва бошқа хизматларини кўрсатиш.

Шунингдек, агентлик таркибига қуйидаги ташкилотлар босқичма-босқич ўтказилади. Жумладан 2023 йил 15 июндан бошлаб:

• Тиббий-ижтимоий экспертиза инспекцияси ва унинг ҳудудий бўлинмалари;
• Ногиронлиги бўлган шахсларни реабилитация қилиш ва протезлаш миллий маркази ҳамда унинг ҳудудий марказлари;
• Аёлларни реабилитация қилиш ва мослаштириш марказлари ҳамда унинг ҳудудий бўлимлари;
• Одам савдоси жабрдийдаларига ёрдам бериш бўйича республика реабилитация маркази;
• ногиронлиги бўлган шахслар ва кексалар учун “Мурувват” ва “Саховат” интернат-уйлари;
• Уруш ва меҳнат фахрийлари учун республика пансионати;
• кексалар, ногиронлиги бўлган шахслар, уруш ва меҳнат фахрийлари учун санаторийлар;.

2024 йил 1 январдан бошлаб:

• болалар уйлари;
• болалар меҳрибонлик уйлари;
• вояга етмаганлар билан ишлаш секторлари ҳамда оилавий болалар уйлари;

2024 йил 1 августдан бошлаб:

• алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатлар, кўп тармоқли ихтисослаштирилган мактабгача таълим ташкилотлари ҳамда ихтисослаштирилган ўқув-тарбия муассасалари;
• имконияти чекланган шахслар учун ихтисослаштирилган касб-ҳунар мактаблари;

2025 йил 1 январдан бошлаб:

• муайян яшаш жойига эга бўлмаган шахсларни реабилитация қилиш марказлари;
• Ижтимоий суғурта жамғармаси.