«Ҳозирда етакчи хотин-қизлар миллий платформасини яратиш устида ишлаяпмиз» — Танзила Норбоева

Тошкентдаги Hyatt Regency Tashkent меҳмонхонасида Фуқаролик жамияти аёллар ташкилотлари иштирокида « ‘Марказий Осиёда тинчлик ва хавфсизликни таъминлашда хотин-қизларнинг ролини кучайтириш тўғрисида’ги БМТнинг 1325-сонли резолюциясини амалга ошириш» мавзусида минтақавий форуми бўлиб ўтмоқда.

Унда Ўзбекистон Олий Мажлис Сенати раиси, Марказий Осиё мамлакатлари етакчи аёллари мулоқоти раиси Танзила Норбоева, БМТ бош котибининг Марказий Осиё бўйича махсус вакили, БМТнинг Марказий Осиё учун превентив дипломатия бўйича минтақавий маркази раҳбари Наталя Герман, «БМТ-Аёллар» тузилмасининг Европа ва Марказий Осиё бўйича минтақавий офиси директори Алия эл-Яссир ва бир қатор халқаро ташкилотлар раҳбарлари, шунингдек, давлат ва нодавлат ташкилотлари, хусусан, Марказий Осиё мамлакатларидан 30 дан ортиқ фуқаролик жамиятларининг аёл вакиллари иштирок этмоқда.

Форум очилишида Танзила Норбоева нутқ сўзлаб, форум мазмун-моҳияти, кўзланган мақсад, тинчлик ва хавфсизликни таъминлаш, превентив дипломатияда аёлларнинг тутган ўрни, иштироки ва роли, бу борада Ўзбекистонда амалга оширилган ишларга алоҳида тўхталиб ўтди.

«Бу галги форум шуниси билан аҳамиятлики, мулоқот аъзолари, давлат тузилмалари, минтақадаги аёллар фуқаролик жамияти ташкилотлари вакиллари, БМТ тузилмалари раҳбарлари ва халқаро экспертлар биринчи маротаба ‘Хотин-қизлар, тинчлик ва хавфсизлик’ глобал кун тартибини миллий ва минтақавий даражада амалга оширишда ҳамкорлик қилиш масалаларини муҳокама қилиш учун Ўзбекистонда тўпланди.

Ҳозирги вақтда биз фаолияти давомида гендер тенгликни тарғиб қилиш, барча даражаларда (маҳалла, туман, вилоят, республика) хотин-қизлар ҳуқуқ ва манфаатларини ҳимоя қилиш масалаларини қамраб оладиган етакчи хотин-қизлар миллий платформасини яратиш устида ишлаяпмиз.

Биз долзарб масалалар, шу жумладан, хотин-қизлар ҳуқуқларини ҳимоя қилиш билан боғлиқ масалаларни ҳал этишда фуқаролик жамияти институтлари муҳим ўрин тутишини биламиз», — деди Танзила Норбоева.

Ҳозирда Ўзбекистонда 10 мингга яқин нодавлат нотижорат ташкилотлари фаолият кўрсатмоқда. Уларнинг 300 дан ортиғи гендер масалалари билан шуғулланади.

Марказий Осиё мамлакатлари етакчи аёллари мулоқоти минтақадаги хотин-қизларни қўллаб-қувватлаш, уларнинг сиёсий, иқтисодий ва ижтимоий ролини ошириш ҳамда барқарор ривожланиш билан боғлиқ қарорларни қабул қилиш жараёнларида иштирок этиш имкониятларини кенгайтириш мақсадида норасмий минтақавий платформа сифатида ташкил этилган.

Марказий Осиё мамлакатлари етакчи аёллари мулоқоти қисқа вақт ичида гендер тенглиги ва барқарор ривожланишни рағбатлантириш, минтақа аёллари ўртасидаги ҳамжиҳатлик ва амалий ҳамкорликни мустаҳкамлаш тарафдори бўлган аёлларнинг муҳим норасмий коалицияси эканини исботлади.

Мулоқот бошланганидан буён қатор учрашувлар ўтказилиб, гендер тенгликни таъминлаш, хотин-қизларнинг ҳуқуқ ва имкониятларини кенгайтиришга оид кўплаб долзарб масалалар, бу борадаги минтақавий ҳамкорлик истиқболлари муҳокама қилинди.