Россия Премьер Лигасининг (РПЛ) бир нечта футболчилари — Алексей Батраков (“Локомотив”), Матвей Кисляк (“ЦСКА”) ва Данил Козлов (“Краснодар”)га тегишли маълумотлар Россияда фаолияти тақиқланган букмекерлик компаниясининг хужжатлар базасида аниқланган. Бу ҳақда “Маш на спорте” Telegram канали хабар берди.
Манбага кўра, 2024 йил охирида хакерлар ушбу ноқонуний букмекерлик платформасининг серверига ҳужум қилиб, фойдаланувчиларнинг маълумотлар базасини қўлга киритган. Ҳуқуқбузарлар маълумотларни ошкор қилмаслик эвазига 15 миллион АҚШ доллари талаб қилишган. Аммо компания тўловни рад этган ва база оммавий равишда интернетда тарқатилган.
Тарқалган архивда Батраков, Кисляк ва Козловга тегишли телефон рақамлари мавжуд бўлиб, улар футболчиларнинг ҳақиқий рақамлари билан мос келиши таъкидланган. Маълумотларга кўра, Батраков ва Кисляк аккаунтларида охирги ҳаракатлар 2021 йилда қайд этилган, Козловнинг аккаунти эса ҳозиргача фаол ҳисобланади.
Шунингдек, ушбу базада яна 11 нафар россиялик футболчи номи мавжудлиги тахмин қилинмоқда.
Агар футболчиларнинг ноқонуний пул тикиш фаолияти тасдиқланса, улар дисквалификация қилиниши мумкин. Мисол учун, “Сокол” (Қозон) клуби ярим ҳимоячиси Александр Сиберкин шунга ўхшаш сабаб билан 10 йил муддатга футбол билан боғлиқ барча мусобақалардан четлаштирилган.
Эслатиб ўтамиз, Ўзбекистонда ҳам шунга ўхшаш ҳолатлар кузатилган. Хусусан, 2022 йил “Локомотив” ва “Пахтакор” клубларида ҳаракат қилган грузиялик футболчи Кахи Maxarадзе букмекерлик компаниялари билан алоқаси сабаб 5 йилга футболга оид фаолиятдан четлатилган ва 100 миллион сўм жарима солинган эди.
Изоҳ (0)