Ижтимоий тармоқларда вояга етмаган болани маъмурий бино хонасида махсус формада бўлган шахс қийноққа солаётгани акс этган видеохабар тарқалди. Ҳолат болалар омбудсмани назоратига олинган равишда ўрганилмоқда.
Келтирилишича, мазкур видеодаги ҳолат бўйича тегишли текширув ўтказиш ва болага нисбатан содир этилаётган ғайриқонуний ҳаракатларга ҳуқуқий баҳо бериш тўғрисида Бош прокуратурага сўров киритилди.
Ҳозирда ҳолат Бухоро вилояти прокуратураси томонидан ўрганилмоқда. Болалар омбудсмани ҳар қандай вазиятда болага нисбатан дўстона муносабатда бўлиш шартлигини таъкидлаган ҳолда, боланинг ҳуқуқларини қўпол равишда бузилишига йўл қўйган масъул шахсларга қонун доирасида қатъий чора кўрилиши зарурлигини билдирди.
Ўтган февраль ойида Сурхондарёда сўроққа олиб кетилган фермер вафот этган, ИИВ Жазони ижро этиш департаментининг Олмалиқдаги 14-сонли колониясидан 21 яшар маҳкум — Муҳаммадқодир Пўлатовнинг жасади чиққан эди.
Маълумот учун, қийноқ оқибатида келиб чиққан ўлим ҳолатлари учун жавобгарлик кучайтирилмоқда. Унга кўра, Жиноят кодексига киритилаётган ўзгартириш ва қўшимчаларга мувофиқ 235-модда 3 ва 4-қисм билан тўлдириляпти:
- ушбу модданинг биринчи ёки иккинчи қисмида назарда тутилган ҳаракатлар баданга оғир шикаст етказилишига сабаб бўлса, муайян ҳуқуқдан маҳрум этиб, 8 йилгача озодликдан маҳрум қилиш билан жазоланади;
- ушбу модданинг биринчи ёки иккинчи қисмида назарда тутилган ҳаракатлар жабрланувчининг ўлимига ёки бошқа оғир оқибатларга сабаб бўлса, муайян ҳуқуқдан маҳрум этиб, 8 йилдан 10 йилгача озодликдан маҳрум қилиш билан жазоланади.
Изоҳ (0)