Тошкент вилояти ИИББ “Вилоятда итларни оммавий отишмоқда” мазмунида кўплаб ёлғон хабарлар тарқатилаётганини маълум қилди.
Қайд этилишича, Пискент туманида итларни ов қуроли билан отган шахсларнинг видеоси интернетда катта шов-шув кўтаргани ортидан айрим норасмий Telegram каналлар вилоят бўйлаб бошқа шаҳар-туманлардан ҳам шу мазмундаги хабарларни оммавий тарқатишга киришди.
Хусусан, Чирчиқ шаҳрида ҳам итлар отилаётгани ҳақида хабар тарқатилган. Вилоят ИИББ буни рад этиб, ёлғон ахборот тарқатиш жавобгарликка сабаб бўлишини эслатди.
Тошкент вилоятининг Пискент туманида номаълум шахслар ов милтиғида итларни отаётгани акс этган видеони “Меҳр ва оқибат” ҳайвонларни ҳимоя қилиш жамияти эълон қилганди. Жамиятга фуқаро Э.З.дан у истиқомат қиладиган шаҳарчада итлар отилгани, натижада Э.З.нинг бир ити ўлгани, иккинчиси оғир аҳволда ветеринар клиникада экани тўғрисида хабар келиб тушган. Гувоҳнинг сўзларига кўра, итларни отишга келганлар орасида ички ишлар, ҳайвонларни тутиш бўлинмаси ходимлари ва овчилар бўлган.
Вилояти ИИББ матбуот хизмати мазкур ҳолат назоратга олинганини, воқеада иштирок этган фуқароларда бўлган ов қуроллари тегишли тартибда олиб қўйилганини билдирди. Ҳозирда ҳолат юзасидан ҳудудий ИИБ томонидан тегишли ҳужжатлар расмийлаштириб, судга юбориш чораси кўрилмоқда.
Ҳайвонларга нисбатан шафқатсизлик
Ўзбекистонда ҳайвонларга нисбатан шафқатсиз муносабатда бўлганлик учун жиноий жавобгарлик белгиланган. Жиноят кодексининг 202-1-моддасига кўра, ҳайвонларга нисбатан шафқатсиз муносабатда бўлиш, яъни ғаразли ёки бошқа паст ниятларда уларни қийноққа солиш ёхуд уларга азоб бериш, уларнинг ўлимига ёки майиб бўлишига олиб келган ҳаракатлар учун маъмурий жазо қўлланилганидан кейин такрор содир этилган бўлса, БҲМнинг 25 бараваридан 50 бараваригача миқдорда жарима ёки 240 соатгача мажбурий жамоат ишлари ёки 1 йилгача ахлоқ тузатиш ишлари ёхуд 6 ойгача озодликни чеклаш ёки 6 ойгача озодликдан маҳрум қилиш билан жазоланади.
Бундан бир неча йил аввал “Дарё” Ўзбекистонда қаровсиз қолган жониворларга бўлган муносабат аслида қандай ҳолатда эканини аниқлашга ҳаракат қилганди. Жиззах шаҳар ободонлаштириш бошқармаси ҳузуридаги ит овлов бригадаси бригадири Эркин Исломов ҳавас учун қўлга қурол олиб, ўқ узилмаслигини, одамлар “Кўчадаги дайди ит, мушук кечаси ухлатмаяпти”, “Фарзандимни тишлаб олди”, “Кўчада бемалол юра олмаяпмиз” мазмунида шикоят қилинганда, шу мурожаатлар бўйича тегишли жойларга борилишини айтганди.
Изоҳ (0)