Ijtimoiy tarmoqlarda voyaga yetmagan bolani ma’muriy bino xonasida maxsus formada bo‘lgan shaxs qiynoqqa solayotgani aks etgan videoxabar tarqaldi. Holat bolalar ombudsmani nazoratiga olingan ravishda o‘rganilmoqda.
Keltirilishicha, mazkur videodagi holat bo‘yicha tegishli tekshiruv o‘tkazish va bolaga nisbatan sodir etilayotgan g‘ayriqonuniy harakatlarga huquqiy baho berish to‘g‘risida Bosh prokuraturaga so‘rov kiritildi.
Hozirda holat Buxoro viloyati prokuraturasi tomonidan o‘rganilmoqda. Bolalar ombudsmani har qanday vaziyatda bolaga nisbatan do‘stona munosabatda bo‘lish shartligini ta’kidlagan holda, bolaning huquqlarini qo‘pol ravishda buzilishiga yo‘l qo‘ygan mas’ul shaxslarga qonun doirasida qat’iy chora ko‘rilishi zarurligini bildirdi.
O‘tgan fevral oyida Surxondaryoda so‘roqqa olib ketilgan fermer vafot etgan, IIV Jazoni ijro etish departamentining Olmaliqdagi 14-sonli koloniyasidan 21 yashar mahkum — Muhammadqodir Po‘latovning jasadi chiqqan edi.
Maʼlumot uchun, qiynoq oqibatida kelib chiqqan o‘lim holatlari uchun javobgarlik kuchaytirilmoqda. Unga ko‘ra, Jinoyat kodeksiga kiritilayotgan o‘zgartirish va qo‘shimchalarga muvofiq 235-modda 3 va 4-qism bilan to‘ldirilyapti:
- ushbu moddaning birinchi yoki ikkinchi qismida nazarda tutilgan harakatlar badanga og‘ir shikast yetkazilishiga sabab bo‘lsa, muayyan huquqdan mahrum etib, 8 yilgacha ozodlikdan mahrum qilish bilan jazolanadi;
- ushbu moddaning birinchi yoki ikkinchi qismida nazarda tutilgan harakatlar jabrlanuvchining o‘limiga yoki boshqa og‘ir oqibatlarga sabab bo‘lsa, muayyan huquqdan mahrum etib, 8 yildan 10 yilgacha ozodlikdan mahrum qilish bilan jazolanadi.
Izoh (0)