Бухоро вилояти Жондор туманида эркак Ўзбекистон Қизил китобига киритилган бўз эчкиэмар оғзига нос солиб, шафқатсиз муносабатда бўлди. Бош прокуратура ҳолат юзасидан маълумот берди.
Унга кўра, мазкур ҳолат юзасидан Бухоро вилояти прокуратураси, Ички ишлар ҳамда Экология, атроф-муҳитни муҳофаза қилиш ва иқлим ўзгариши бошқармаси ходимларидан иборат ишчи гуруҳ тузилиб, тезкор ўрганиш ишлари амалга оширилди.
Аниқланишича, жорий йил 1 июнь куни Жондор тумани “Ёш куч” маҳалласида яшовчи фуқаро Ғ.Ғ. чўл ҳудудидаги дала шийпонига тасодифан кириб қолган бўз эчкиэмарни ушлаб, унинг оғзига тамаки маҳсулотини солган ва кейинчалик яйловга қўйиб юборган.
Ушбу ҳолат юзасидан тегишли ҳужжатлар расмийлаштирилиб, ҳозирда ички ишлар органлари томонидан терговга қадар текширув ҳаракатлари ўтказилмоқда.
Текширув ҳаракатлари прокуратура томонидан назоратга олинган.
Амалдаги қонунчиликка мувофиқ, ҳайвонларга, хусусан муҳофаза остидаги турларга нисбатан шафқатсиз муомала қилиш учун маъмурий ва жиноий жавобгарлик белгиланган. Бундай хатти-ҳаракатлар нафақат ахлоққа зид, балки табиий муҳит ва биологик хилма-хилликка таҳдид солувчи жиддий ҳуқуқбузарлик ҳисобланади.
Қайд этилишича, прокуратура органлари томонидан мутасадди идоралар билан ҳамкорликда экологик қонунчилик ижросини таъминлаш, бундай ҳолатларнинг олдини олиш ва жамиятда масъулият ҳиссини оширишга қаратилган тизимли чора-тадбирлар изчил давом эттирилади.
Бундан аввал Сурхондарёда икки йигит тошбақага нос чектирган эди. Ҳолат юзасидан икки нафар фуқаронинг ҳар бирига нисбатан Маъмурий жавобгарлик тўғрисидаги кодекснинг 111-моддасига асосан БҲМнинг 3 баробари — 1 миллион 20 минг сўм миқдорида жарима белгиланди.
Эчкиэмар оғзига нос солинса нима бўлади?
Эчкиэмар каби судралиб юрувчиларнинг организми носдаги моддаларни қабул қилишга мослашмаган, шунинг учун бу уларнинг соғлиғи учун хавфли бўлиши мумкин. Жуда кичик тана тузилмаси туфайли носдаги заҳарли моддалар (хусусан никотин) тезда бутун танага тарқалади. Бу кўпинча ўлим билан якунланади.
Изоҳ (0)