Олий Мажлис Қонунчилик палатасининг 10 июндаги ялпи мажлисида депутатлар экология, атроф-муҳитни муҳофаза қилиш ва иқлим ўзгариши вазири Азиз Абдуҳакимовга “Қаттиқ маиший чиқиндиларни қайта ишлашнинг самарали ва замонавий тизимини яратиш ҳамда чиқинди полигонларини ёпиш ва рекултивация қилиш борасида амалга оширилаётган ишлар тўғрисида” парламент сўровини юбориш масаласини кўриб чиқди.
Мажлисда қайд этилишича, сўнгги йилларда мамлакатда атроф-муҳитни муҳофаза қилишни таъминлаш, хусусан, қаттиқ маиший чиқиндиларни тўплаш ва қайта ишлашнинг самарали ва замонавий тизимини яратиш ҳамда чиқинди полигонларини ёпиш ва рекултивация қилиш борасида ишлар амалга оширилмоқда. Лекин бу борада муайян ишлар амалга оширилган бўлсада, ўз ечимини кутаётган қатор масалалар мавжуд.
Жумладан, қаттиқ маиший чиқинди полигонларини ёпиш, рекултивация қилиш, уларни қайта юклаш станцияларини ҳамда чиқиндиларни қайта ишлашни ташкил этиш, хизмат кўрсатувчи санитар тозалаш корхоналари томонидан чиқиндиларни тоифаларга ажратган ҳолда тўплаши учун махсус чиқинди пакетлари билан (QR-кодли) бепул таъминлаш, қайта ишлаш ёки экологик хавфсиз тарзда утилизация қилишни йўлга қўйган тадбиркорларга “яшил субсидиялар” ажратиш тизимини жорий этиш бўйича дастурларда белгиланган айрим лойиҳалар ижроси кечикмоқда.
Бундан ташқари, электромобиллар кенг оммалашиб бораётгани нуқтайи назардан келгусида, уларнинг аккумулаторлари яроқлилик муддати тугагандан сўнг ёки турли сабабларга кўра ишдан чиққанда сақлашни ташкил этиш ҳамда утилизация қилиш масалаллари кун тартибига чиқмоқда.
Мажлисда юқоридагилардан келиб чиқиб, қаттиқ маиший чиқиндиларни қайта ишлашнинг самарали ва замонавий тизимини яратиш ҳамда чиқинди полигонларини ёпиш ва рекултивация қилиш борасида амалга оширилаётган ишлар юзасидан асослантирилган тушунтиришлар бериш ҳақида экология, атроф-муҳитни муҳофаза қилиш ва иқлим ўзгариши вазирига парламент сўрови юборилди.
Экология вазирлиги раҳбаридан гибрид автомобиллар учун экологик сертификат талабларини тушунтириш сўралиб Азиз Абдуҳакимовга сенаторлик сўрови ҳам юборилганди. 28 майдаги ялпи мажлисда вазирликнинг сенатор сўровига жавобида айрим маълумотлар тушиб қолгани, уларга аниқлик киритилмагани айтилди. Экология вазирлиги ва Божхона қўмитаси масъуллари ҳозирги кунда гибрид автомобилларни мамлакатга импорт қилишда экологик сертификат талаб қилинмаётганини билдирди. Буни аниқ белгилаб қўйиш мақсадида Вазирлар Маҳкамаси қарори лойиҳаси ишлаб чиқилган.
Изоҳ (0)