Хитой оммавий ахборот воситаларининг хабар беришича, мамлакатда COVID-19 тарқалишининг олдини олишдаги камчиликлар туфайли 30 дан ортиқ кадрлар турли даражадаги жавобгарликка тортилган.
Хабарларга кўра, айрим шаҳарларда вице-мер даражасидаги бир нечта мансабдорлар, шаҳар округи раҳбарлари, маҳаллий соғлиқни сақлаш қўмиталари ва тиббиёт муассасалари раҳбарлари ўз лавозимидан айрилган.
Хусусан, Хитойнинг Сзянсу провинцияси шарқидаги Нанкин шаҳрида маҳаллий аэропортда коронавирус тарқалиши туфайли 15 амалдор жазоланди.
Таъкидланишича, Нанкин шаҳри вице-мэри Ху Ванжин эпидемияга қарши кураш вазифаларини самарасиз бажаргани учун жаримага тортилган. Маҳаллий соғлиқни сақлаш комиссияси раҳбари Фанг Чжуню ҳам жазоланган, у сифатсиз иш учун лавозимидан четлатилиб, «жиддий огоҳлантириш» олган. Тергов натижасида Eastern Airports бош директорининг ўринбосари Ван Чао қўлга олинган. Бу ташкилот аэропортда инфекцияларни назорат қилиш билан шуғулланади. ОАВ хабарига кўра, тергов олиб борилаётгани сабабли жиноятчилар сони ортиши мумкин.
Қайд этилишича, Нанкин Лукоу халқаро аэропорти мамлакат бўйлаб 20 дан ортиқ шаҳарга тарқалган дельта штаммининг эҳтимолий манбаси ҳисобланади. Мазкур штамм ёйила бошлагач бутун мамлакат бўйлаб аэропортлар ва божхона коронавирус тарқалишининг олдини олиш учун қаттиқроқ чоралар кўрди.
Хитой ҳукумати мамлакатда инфекция тарқалишини тўхтата олмаяпти. Хитой Соғлиқни сақлаш давлат қўмитасининг маълумотларига кўра, 8 август куни Хитойда 125 кишида коронавирус аниқланган, улардан 94 нафари мамлакат ичида: Хенан провинциясида — 41, Сзянсу вилоятида — 38, Хунан вилоятида — 12, ва Хубэй вилоятида — 3 киши.
COVID-19 туфайли Хитой ўз фуқароларига хорижга чиқиш паспорти беришни вақтинча тўхтатмоқчи. Хитойликлар фақат фавқулодда ҳолатлардагина мамлакатни тарк этиш учун рухсат олиши мумкин бўлади. Ҳукумат бошқа давлатга сафар қилиш бўйича берилган аризаларни қатъий текширади.
Июль бошида бутун дунёда дельта штамм тарқалаётгани оқибатида Хитойда ҳам COVID-19 билан касалланган беморлар кўпая бошлади. Коронавирус юқтириб олиш ҳолатлари туфайли Хитойнинг бир нечта шаҳарларида аэропортлар ёпилди, поездлар ҳаракати чекланди ва карантин жорий этилди. Нанкин шаҳрида деярли барча аҳоли, яъни 8,7 миллион кишидан коронавирусга тест олинди.
Изоҳ (0)