“Реал Мадрид” ҳали ҳам “Байер” ярим ҳимоячиси Флориан Вирцни қўлга киритиш фикридан воз кечмаган. Бу ҳақда АS нашри хабар бермоқда.
Манбага кўра, мадридликлар футболчи учун курашда “Ливерпуль” устун эканлигини билса-да, немис футболчисини сотиб олиш фикридан қайтмаган.
Мерсисайдликлар яқин вақтгача Вирц учун асосий даъвогарлар рўйхатида йўқ эди. Асосий кураш “Бавария”, “Манчестер Сити” ва “Реал Мадрид” ўртасида кечаётгани айтилганди. Германия нашрларида эса Вирц мюнхенликалар сафига ўтиши борасида миш-мишлар тақалганди, бироқ сўнгги сонияларда “Бавария” футболчи учун курашдан чиқди.
“Реал” томондагилар Хаби Алонсодан умид қилиб турибди. Чунки футболчи ва мураббий узоқ вақт давомида “Байер”да бирга ишлаган. Испаниялик мутахассис яқинда “қироллик клуби” бош мураббийи этиб тайинланди. “Қаймоқранглилар” раҳбарияти Алонсонинг келиши футболчининг фикрини ўзгартиради деб ўйламоқда.
АS нашрига кўра, Вирц ёзнинг энг катта трансферларидан бири бўлиши мумкин. Сабаби “Байер” клуби бош директори Фернандо Карро апрель ойида футболчининг нархини 150 миллион евро деб белгилаган эди.
Жорий мавсум Вирц “Байер”нинг барча мусобақалар доирасидаги 45 ўйинда майдонга тушиб, ўз ҳисобига 16 та гол ва 15 та голли узатма ёздириб қўйган. Transfermarkt портали Флорианнинг қийматини 140 миллион еврога баҳоламоқда.
Изоҳ (0)