Германиянинг Эисенҳуттенстадт шаҳри ўз аҳолиси сонини кўпайтириш мақсадида одамларни кўчиб келишга ундаш учун икки ҳафталик бепул турар жой таклиф қилмоқда. Бу ҳақда CNN хабар берди.
Шаҳар маҳаллий кенгашига кўра, кўчиб келишни режалаштираётганларга 14 кунлик бепул синов муддати таклиф қилинмоқда. Аризалар 2025 йилнинг июль ойигача қабул қилинади.
“Ушбу лойиҳа Эисенҳуттенстадтга кўчиб келишга қизиққан ҳар қандай кишига мўлжалланган — масалан, ишга қатновчилар, шаҳарга қайтмоқчи бўлганлар, малакали ишчилар ёки ҳаво алмаштирмоқчи бўлганлар”, дейилади баёнотда.
Танланган иштирокчилар 6 сентябрдан 20 сентябргача шаҳарда жиҳозланган квартирада бепул яшаш имконига эга бўлади. Бу “Make Plans Now” деб номланган инновацион иммиграция лойиҳаси доирасида амалга оширилади. Иштирокчилар 14 кун давомида шаҳардаги ҳаётни яқиндан ўрганади. Бунинг учун турли тадбирлар ташкил этилади. Шаҳар бўйлаб саёҳат, заводга ташриф ва бошқа кўнгилочар чиқишлар шулар жумласидандир. Шунингдек, иштирокчиларга доимий қолиш имконияти ҳам берилиши ҳам мумкин.
1950 йилда ташкил топган Берлиндан 60 мил узоқликда жойлашган Эисенҳуттенстадт шаҳри собиқ Шарқий Германиянинг социалистик шаҳри ҳисобланади. Дастлаб Сталин шаҳри (Сталинстадт) деб аталган, аммо 1989 йилда Берлин девори қулагач ва Германия бирлашгач, Эисенҳуттенстадт номига ўзгарган. Шарқий Германиянинг кўплаб шаҳар ва қишлоқлари сингари, бу ерда ҳам аҳоли сони Германия бирлашгандан кейин камайган. Илгари 50 мингдан кўп бўлган аҳоли ҳозир тахминан 24 мингга баҳоланмоқда.
Изоҳ (0)