Экология, атроф-муҳитни муҳофаза қилиш ва иқлим ўзгариши вазирлиги тасарруфидаги “Юқори Тўпаланг” миллий табиат боғининг “Зевар” бўлимида ўрнатилган фотоқопқонларга Тян-Шан қўнғир айиғи муҳрланди.
Қўнғир айиқ Табиатни муҳофаза қилиш халқаро иттифоқи (IUCN) Қизил рўйхати ва Ўзбекистон Қизил китобига заиф, кенг, аммо мозаик тарзда тарқалган кичик тур мақомида киритилган.
Ғарбий Тян-Шан ва Помир-Олойда (республика бўйича Тошкент, Жиззах, Сурхондарё, Қашқадарё ва Самарқанд вилоятларида) учрайди. 1970–1980 йилларда сони Ғарбий Тян-Шанда атиги 200-220 тани ташкил қилган, аммо сўнгги ўн йилликлардаги табиатни муҳофаза қилиш чоралари туфайли қўнғир айиқларнинг сони барқарорлашди ва республика бўйича 500 дан ортиқни ташкил этди.
Фотоқопқонга муҳрланган ноёб ҳайвонлар
2023 йилнинг сентябрь охирларида “Зомин” давлат қўриқхонасига ўрнатилган фотоқопқонга “Арча майдон” ҳудудида сайр қилиб юрган она-бола Туркистон силовсини тушиб қолгани маълум бўлган эди. 2022 йилнинг октябрь ойида “Сурхон” давлат қўриқхонасига ўрнатилган фотоқопқонга манул тушиб қолганди. Шунингдек, “Ҳисор” давлат қўриқхонаси қўриқлаш ходимлари томонидан ўрнатилган фотоқопқон объективига Туркистон силовсини, “Чотқол” давлат биосфера қўриқхонасида эса қор қоплони муҳрлангани тўғрисида хабар берилганди.
Изоҳ (0)