Чироқчидаги қишлоқда пайдо бўлган ёввойи айиқ отиб ўлдирилгани айтилмоқда (видео)

Қашқадарё вилоятининг Чироқчи туманидаги қишлоқда пайдо бўлган ёввойи айиқ отиб ўлдирилгани хабар берилди. Тармоқларда айиқнинг отилгани акс этган видеотасвирлар ҳам пайдо бўлди.

Табиат ресурслари вазирлиги ахборот хизмати вакили бу хабарни тасдиқлади.

Масъул “Дарё” журналистининг “айиқ вазирлик вакиллари томонидан отилганми ёки маҳаллий аҳоли томониданми?” деган саволига “бунга аниқлик киритилмоқда”, дея жавоб қайтарган.

Аввалроқ айиқ одамлар яшовчи қишлоққа боргани ва ҳатто ушбу ҳудуддаги умумтаълим мактаби биносига киришга урингани хабар берилганди. Кейинчалик ҳокимлик бунга муносабат билдириб, айиқ қишлоқдаги жарликлардан бирига кириб олганини, айиқнинг одамларга зарар етказмаслиги, шунингдек, одамлар ҳаётига хавф солмаслиги масъуллар назоратида экани айтилганди.