Якунланаётган ҳафтада Ўзбекистонда таъбир жоиз бўлса, кўз кўриб қулоқ эшитмаган воқеалар рўй берди. Аввалига ёмғир ёғиб, Тошкент кўчаларини сув босди, одамлар қайиқ хизматига эҳтиёж сезди. Бироз ўтмай, Сергелидаги кўп қават уйларнинг бирида яшовчи она уч нафар фарзандини тўққизинчи қаватдан пастга улоқтириб, норасидалар жонига қасд қилди. Ҳафта якунида эса Қашқадарёнинг Чироқчи туманидаги қишлоқларнинг бирига айиқ оралади, Кўкдала туманидаги хонадонга эса бўри кириб келди.
“Дарё” ҳафтанинг энг эсда қоларли воқеалари кетма-кетлигини ёдга олишда давом этади.
Ўтган ҳафта якуни ва жорий ҳафта бошида ёғган ёмғир пойтахт кўчаларини сувга тўлдирди. Автомобильлар сувда қолиб, ҳаракатланишдан тўхтади. Шундай пайтда нафақат ҳайдовчилар, йўловчилар ҳам қайиқ хизматига эҳтиёж сезди.
Бир кундан сўнг Тошкент шаҳри ҳокимлиги ахборот хизмати пойтахт кўчаларида сув тошганига изоҳ берди.
Қайд этилишича, Тошкент шаҳридаги лотокларнинг ўртача диаметри 300 миллиметрга тенг. Улар ёғингарчилик сувларини коллекторлар ва каналларга етказади. 2 апрель куни икки соат давомида кузатилган кучли ёғингарчилик натижасида 20 миллиметр ёмғир ёғган ва бу апрель ойи учун белгиланган умумий меъёрнинг, яъни 60 миллиметрнинг учдан бир қисмига тенг бўлган.
“Лотоклар бир пайтнинг ўзида бундай катта оқимни қабул қилишга мўлжалланмагани боис шаҳримиздаги бир неча манзилгоҳларда сув тўпланиши кузатилди”, — дейилади ҳокимлик муносабатида.
Таъкидланишича, ушбу ҳолатни тезкорлик билан бартараф этиш мақсадида Тошкент шаҳар Ободонлаштириш бош бошқармаси ва унинг туман бошқармалари, коммунал соҳа тизимлари, Фавқулодда вазиятлар бошқармаси ҳамда Ички ишлар бош бошқармасининг 500 дан ортиқ ходимлари ва юздан ортиқ махсус техникалари жалб этилиб, соат 23:00 гача барча манзиллардаги ҳолатлар бартараф этилган.
Якунланаётган ҳафтада Ўзбекистонда кўз кўриб қулоқ эшитмаган воқеалар ҳам содир бўлди. Қашқадарё вилоятидаги қишлоқларга аввалига айиқ, сўнгра бўри оралади. Самарқанддаги қўриқхонадан келиб қолгани тахмин қилинган қўнғир айиқ оломонга дуч келиб, ўзини йўқотиб қўйди. Одамлар ҳамласи-ю, автомобиллар таъқибидан қўрқиб қолган айиқ одамлар яшовчи хонадонларга, ҳудуддаги мактаб биносига киришга ҳам уринди. Кейин эса жарликлардан ҳосил бўлган ғорга беркиниб, кўп ўтмасдан отиб ташланди.
Ижтимоий тармоқларда аввалига айиқ Чироқчи тумани ҳокими топшириғига кўра отилгани ёзилган бўлса, Табиат ресурслари вазирлиги айиқни ўлдириш ҳақидаги топшириқ туман ИИБ бошлиғи буйруғи эканини очиқлади. Айиқ ўлдирилишича, одамлар хавфсизлиги сабаб қилиб кўрсатилди. Масъуллар айиқни ўлдирганларга нисбатан чора кўрилишини билдирди.
Кўп ўтмай Чироқчи туманига қўшни туман Кўкдаладаги хонадонларнинг бирига бўри кириб боргани хабар берилди. Бу сафар ҳайвон отилмади, ўлдирилмади.
“Бўрини табиат қўйнига қўйиб юбориш чоралари кўрилмоқда”, — деди бу ҳақда расмий ахборот берган Табиат ресурслари вазирлиги.
Ҳафтанинг энг даҳшатли воқеаси эса Сергели туманида 27 ёшли аёл 5, 4 ёшли ўғиллари ва ҳали бир ёшга ҳам тўлмаган фарзандларини кўп қаватли уйнинг тўққизинчи қаватидан отиб юбориб, жонига қасд қилгани бўлди. Икки боласини деразадан улоқтирган она олти ойлик чақалоғини қўлига олиб, ўзи ҳам пастга сакраган ва ўша жойнинг ўзида вафот этган.
Кейинчалик марҳума уч нафар фарзанди билан олти ойдан бери она уйида яшаб келаётгани, турмуш ўртоғи билан ўртасида келишмовчиликлар бўлиб тургани маълум бўлди. Воқеа содир бўлган ҳудудда яшовчи аҳоли вакиллари воқеадан даҳшатга тушган бўлса, ОАВ манбалари марҳума ўлимидан аввал эрига видеомурожаат қолдириб, болаларини Аллоҳ даргоҳига юбораётганини айтганини ошкор қилди. Ҳолат юзасидан Жиноят кодексининг 97-моддаси (қасддан одам ўлдириш) ва 103-моддаси (ўзини ўзи ўлдириш даражасига етказиш) моддалари билан жиноят иши қўзғатилган.
Қашқадарё вилоятининг Косон туманида раҳбарлик қилиб келаётган Асрол Бойқараев Рамазон ойида рўзадор сувчиларга сув ичириб, рўзасини очиргани хабар берилган бўлса, Тошкент вилояти ҳокими муқаддас рамазон ойида отасини қаровсиз қолдирган айрим фарзандаларга дакки бериб, инсофга чақирди.
Қолаверса, якунланаётган ҳафтада Хоразм вилоятида юз берган — оилавий меҳрибонлик уйи тарбияланувчилари бўлган 15, 16 ва 17 ёшли қизларни 10 ой давомида зўрлаб келган Адлия бошқармаси ва Фавқулодда вазиятлар бўлимининг собиқ раҳбарларига нисбатан ўқилган суд ҳукми адолатсиз экани айтилиб, иш Олий судда қайта кўриб чиқилиши маълум бўлди. Қашқадарё вилоятининг Чироқчи туманида эса ўзи асраб олган 13 ёшли қизни зўрлаган, қиз ҳомиладор бўлиб қолгач, ҳомилани мажбуран олдириб ташлаган 52 ёшли эркакка Жиноят кодексининг 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) 2-қисми ва 118-моддаси (номусга тегиш) 3-қисми “а” бандида назарда тутилаётган жиноятларни содир этиш айби қўйилди ва мазкур иш Жиноят ишлари бўйича Чироқчи туман судида кўриб чиқилмоқда.
Изоҳ (0)