Украина армияси собиқ бош қўмондони Валерий Залужний 1991 йилги чегараларни қайтариб олишга умид қилмасликка чақирди. Бу ҳақда у “Хавфсизлик экспорти: дунёдаги Украина қуроллари” форумида нутқ сўзлади.
Залужний 2024 йилдан бери Украинанинг Буюк Британияда элчиси лавозимида фаолият юритиб келмоқда. У Россия урушни давом эттириш учун етарли ресурсларга эга эканини айтмоқда.
Умид қиламанки, бу залда ҳали ҳам қандайдир мўжизани — оққуш каби келиб, Украинага тинчлик, 1991 ёки 2022 йил чегараларини олиб кирадиган бирор қудратли кучни кутаётган одамлар қолмаган. Шахсий фикримча, душман бизнинг ҳудудимизга зарба бериш ва алоҳида ҳужум ҳаракатларини амалга оширишга уриниш учун ресурс, куч ва воситаларга эга экан, ҳудудни тўлиқ қайтариб олиш ҳақида гапиришга ҳали эрта, деган у.
Унинг сўзларига кўра, Россиянинг урушни давом эттириш қобилияти тўғридан тўғри унинг ихтиёридаги ресурсларга боғлиқ. 2023 йил охиридан бошлаб Россия урушни “чарчатиш” усулида олиб бормоқда.
Залужний ғалабага фақат Россиянинг ҳарбий ҳаракатлар олиб бориш қобилияти тўлиқ йўқ қилингандагина эришиш мумкинлигини айтди. У Россиянинг ҳарбий ва иқтисодий салоҳияти бутунлай йўқ қилиниши кераклигини таъкидлади.
Шунингдек, Залужний Украинада инсон ресурслари етишмаслиги ва иқтисодий вазият оғирлигига эътибор қаратди.
Биз фақат юқори технологияларга асосланган, омон қолиш учун олиб бориладиган уруш ҳақида гапира оламиз. Бунда максимал фойда олиш учун минимал инсон ресурслари, иқтисодий воситалар ишлатилади. Демография ва иқтисодиёт шароитида Украина бошқа урушга қодир эмас ва бу ҳақда ўйлашнинг ҳам ҳожати йўқ, деди собиқ бош қўмондон.
2023 йил ноябрь ойида Украина президенти Владимир Зеленский Украина ҳозирча 1991 йилги чегараларни қайтариб олиш учун етарли кучга эга эмаслигини билдирганди. У Қримни дипломатик йўл билан қайтаришга тайёр эканини маълум қилган.
Изоҳ (0)