Россия истилоси бошланганидан буён 10 мингдан 13 минг нафаргача Украина ҳарбий хизматчилари ҳалок бўлган. Бу ҳақда Украина президенти офиси маслаҳатчиси Михаил Подоляк Украина қуролли кучлари Бош штаби маълумотларига таяниб маълум қилди.

«Шубҳасиз, Урсула хоним (Урсула фон дер Ляйен — Еврокомиссия раҳбари) адашди — бу аниқ-равшан. Шунинг учун ҳам улар бу видеони ўчириб ташлади, рақамларни олиб қўйди. Бизда Бош штабнинг расмий маълумотлари бор, улар олий бош қўмондон томонидан эълон қилиб борилади. Украинанинг уруш чоғидаги талафотлари 10 мингдан 12,5—13 минг нафаргача қурбонлардан иборат… Ҳа, бизда жароҳатлар туфайли йўқотишлар кўпроқ», — дея маълум қилди Подоляк телевидение орқали.

Маслаҳатчининг сўзларига кўра, Еврокомиссия раҳбари тинч аҳоли ўртасидаги қурбонлар бўйича келтириб ўтган рақамлар ҳам нотўғри. Подоляк қайд этишича, бу рақам «20 минг эмаслиги аниқ, балки ундан ҳам кўпроқ, айниқса, Украина қуролли кучлари томонидан озод этилган ҳудудларда топилган оммавий қабрларни ҳисобга олганда.

30 ноябрь куни Еврокомиссия раҳбари Урсула фон дер Ляйеннинг Twitter’ига унинг видеомурожаати жойланди, унда даъво қилинишича, Украинада шу пайтгача 20 мингдан ортиқ тинч аҳоли ва 100 минг нафар ҳарбий хизматчи ҳалок бўлган. Кейинроқ видео ўчириб ташланди. Унинг ўрнига таҳрирланган ролик жойлаштирилди, унда эса талафотлар ҳақидаги гаплар йўқ эди.

Еврокомиссия жамоатчилик билан алоқалар департаменти раҳбари Дана Спинант маълум қилишича, фон дер Ляйеннинг мурожаатига ҳалок бўлган украиналик аскарлар ҳақидаги ахборот ташқи манбалардан олинган.Бу маълумотлар Россиянинг шафқатсизлигини намойиш этиши керак эди, дея тушунтирди у.

Сўнгги марта Украина ҳукумати ўзининг ҳарбий талафотлари ҳақида август ўрталарида маълум қилганди. Ўшанда Украина қуролли кучлари бош қўмондони Валерий Залужний Россия истилоси бошланганидан буён қарийб тўққиз минг нафар украин ҳарбийлари ҳалок бўлганини айтганди. Еврокомиссия раҳбарининг видеомурожаатидан кейин Украина қуролли кучлари Бош штаби Украинанинг ҳарбий талафотлари ҳақидаги ахборот ёпиқ маълумот эканини билдирди.

Ноябрь бошида АҚШ Штаб бошлиқлари бирлашган қўмитаси раҳбари Марк Милли Россия қўшинлари ҳалок бўлган ва яраланган аскарлари сони 100 мингдан ошишини маълум қилди. У Украина томони ҳам тахминан шунча талафот кўрганини тахмин қилди.

Россия Мудофаа вазирлиги Украинадаги талафотлари ҳақида атиги уч марта ҳисобот берган. Сўнгги марта 21 сентябрь куни, Россияда сафарбарлик эълон қилинган кунда маълумот берилган. Ўшанда мудофаа вазири Сергей Шойгу жанглар чоғида 5937 нафар россиялик аскар ҳалок бўлганини айтганди.