Украина Қуролли кучлари бош қўмондони Валерий Залужний лавозимидан олингани ҳақида норасмий хабарлар тарқалди. Украина Мудофаа вазирлиги мазкур хабарларни рад этди. Бу ҳақда BBC хабар берди.
29 январь куни кечқурун айрим Россия ва Украина оммавий ахборот воситаларида Залужнийнинг истеъфога чиқиши, унинг ўрнига Украина разведкаси раҳбари Кирилл Буданов келиши ҳақидаги миш-мишлар кенг тарқалди. Таниқли журналистлар ҳам Украина президенти Владимир Зеленский генерал Валерий Залужнийнинг истеъфога чиқиши ҳақидаги фармонни имзолаганини эълон қилди.
Олий Раданинг айрим депутатлари ҳам Залужний ишдан бўшатилган ёки ишдан бўшатилмоқчи бўлганини даъво қилди. Зеленскийнинг матбуот котиби Сергей Никифоров бу миш-мишларни рад этди. Украина президенти ўзининг тунги видеомурожаатида Залужний ҳақида гапирмаган.
Economist мухбири Оливер Керролл Зеленский ва Залужний 29 январь куни учрашганини, аммо Украина Қуролли кучлари бош қўмондонини ишдан бўшатиш ҳақидаги фармон имзоланмаганини маълум қилди.
Генерал Залужнийнинг ўзи маҳаллий вақт билан ярим тундан кўп ўтмай Facebook'да Бош штаб бошлиғи Сергей Шаптала билан ҳеч қандай изоҳсиз тушган суратини эълон қилди.
2023 йил охирида кўплаб кузатувчилар ва оммавий ахборот воситалари Украина президенти Владимир Зеленский ва Валерий Залужний ўртасидаги келишмовчилик ҳақида хабар берган эди. Россия босқинини тўхтатиб, босиб олинган ҳудуднинг бир қисмини қайтариб олишга муваффақ бўлган ҳарбий генерал ҳозирда Украинадаги энг машҳур одамлардан бири ҳисобланади.
Ғарб оммавий ахборот воситаларининг ёзишича, Украина президенти Залужнийнинг тобора оммалашиб бораётгани, унинг “уруш боши берк кўчага киргани ва позицияли урушга ўтилиши”ни эълон қилганидан ғазабланган.
Зеленский ушбу далилларни шарҳлар экан, у ва Залужний ўртасида иш муносабатлари борлигини айтди.
“Залужнийни ишдан олиш Зеленский учун фойдали эмас”
Украина президенти офиси собиқ маслаҳатчиси Арестович Украина Қуролли кучлари бош қўмондонини ишдан олиш Зеленский учун фойдали эмаслигини таъкидлади.
“Агар Зеленский Залужний билан рақобатдан қўрқса, унда Залужнийни ҳозир истеъфога чиқариш, уни кучли сиёсий арбобга айлантириш демакдир. Чунки у ҳарбий хизматчи сифатида Зеленскийдан энди ҳеч нарса қарздор бўлмайди. У оддийгина Украина фуқароси бўлиб қолади, у уруш шароитида хоҳлаганини айта олади ва қила олади”, — дейди у.
Изоҳ (0)