Ўзбекистонлик ҳаж зиёратчилари дастлабки гуруҳи Саудия Арабистонига жўнаб кетди (фото)

“Ҳаж-2025” мавсумининг илк зиёратчилари 13 май куни Тошкент халқаро аэропортидан Саудия Арабистонига жўнаб кетди.

Ўзбекистон мусулмонлари идораси матбуот хизматининг маълум қилишича, Тошкент халқаро аэропортида бўлажак ҳожиларни кузатишда муфтий шайх Нуриддин Холиқназар, Дин ишлари бўйича қўмита раиси Содиқжон Тошбоев, шунингдек, таниқли уламолар, имом-домлалар, мутасаддилар ва ОАВ вакиллари қатнашди.

Муфтий Шайх Нуриддин Холиқназар зиёратчилар эсон-омон ҳаж амалларини бажариб, Ўзбекистонга соғ-саломат қайтиб келишларини сўраб дуолар қилди.

“Ҳаж-2025” мавсуми ҳақида 

Ўзбекистонда 13—28 май кунлари зиёратчилар 9 та ҳудуд — Тошкент, Бухоро, Наманган, Самарқанд, Қарши, Термиз, Урганч, Навоий ва Нукус шаҳарларидаги аэропортлар орқали Мадина шаҳрига кузатилади. Улар учун Мадина шаҳрида муҳташам Zam-zam Pullman меҳмонхонаси, Маккада Marmara hotel, Romance hotel, Аl-Ayyam elite, Concrete hotel, Abroj Dania, Paradise, Open hotel ва Ayed sahа каби 8 та меҳмонхонада барча шарт-шароитлар яратилиб, ҳожиларни юқори савияда кутиб олишга шай қилинди. “Ҳаж – 2025” мавсумида ҳожиларга 14 нафар мингбоши, 303 нафар элликбоши хизмат қилади. Шунингдек, ишчи гуруҳи, шифокорлар ва ошпазлар жалб қилинган.

Ҳаж нархи

2019 йилда Ўзбекистонда бир кишининг ҳажга бориб келиши 33,3 млн сўмни (ўша пайтдаги курс бўйича 3879 доллар) ташкил этган. Пандемиядан сўнг 2022 йилга келиб ҳаж зиёрати нархи кескин (деярли икки баравар) ошган ва бир кишилик тўлов 62 миллион 900 минг сўм этиб белгиланди. Ўшанда Мусулмонлар идораси нарх қимматлашишига Саудия ҳукумати ҳаж сафарига доир қўшимча солиқ ва мажбурий тўловлар жорий этгани, транспорт ҳамда бошқа қатор хизматлар қиймати кескин ошганини сабаб қилиб кўрсатган эди. Шундан сўнг ҳам нархлар ошишда давом этди — 2023 йилда 68 миллион 760 минг сўм, 2024 йилда эса 73 миллион 970 минг сўмни ташкил этган. Ўзбекистонлик зиёратчилар 2025 йилги ҳаж мавсуми учун 78 миллион 670 минг тўлайди.

Ҳаж учун тўланган маблағ ичига нималар киради?

• ҳаж визаси;
• авиабилет (Мадинайи мунавварага тўғридан тўғри авиарейс);
• Zam-zam Pullman, Краун Плаза (Мадина шаҳрида) ҳамда Аброж ал-Ҳидоя (Макка шаҳрида) меҳмонхоналарида яшаш;
• шаҳарлараро (Мадина—Макка—Жидда) транспорт хизмати;
• ҳожиларнинг тиббий суғуртаси;
• 3 маҳал иссиқ овқат: нонушта, тушлик ва кечки овқат;
• Мадинадаги Уҳуд тоғи, Қубо ва икки қиблали масжидларга зиёрат;
• Маккадаги Мино, Арофат ва Муздалифа водийларидаги барча хизматлар;
• 24/7 режимидаги тиббий хизмат;
• 24/7 режимидаги транспорт хизмати;
• қурбонлик;
• замзам суви (5 литр);
• республиканинг 7 та ҳудудидан кузатиш ва кутиб олиш;
• давлат рамзлари туширилган нимча ва сумка;
• ҳаж қўлланмаси.

Ўзбекистонда ҳаж квотаси сўнгги йилларда 3 баробарга оширилган

Ўзбекистонликлар учун ҳаж квотаси сўнгги йилларда 3 баробарга оширилган бўлиб, ҳар йили 15 минг нафар ўзбекистонликлар ҳожи бўлмоқда, 2024 йилги ҳаж мавсумида Ўзбекистонда 15 150 нафар зиёратчи ҳаж амалини бажарган.