Шавкат Мирзиёев Мусулмонлар идораси раиси, муфтий шайх Нуриддин Холиқназар билан телефон орқали мулоқот қилди. Бу ҳақда Президент матбуот хизмати хабар берди.
Давлат раҳбари Саудия Арабистонига қилган ташрифи давомида ўтказилган музокаралар натижасида жорий ҳаж мавсумига бошқача тайёргарлик кўрилгани, янгидан янги тизимлар жорий этилганини таъкидлади.
“Эътибор мутлақо бошқача бўляпти. Шуни ҳозир зиёратга борган зиёратчиларимиз сезяптими? Кайфиятларингиз қандай, шароитларда яна нима етишмайди, қандай тажриба орттирилди, келгусида қилиниши керак бўлган ишлар бўйича, отахон ва онахонларимизнинг кайфиятлари, соғликлари қандай?” — деб сўради президент.
Шайх Нуриддин Холиқназар Шавкат Мирзиёевга, аввало, муборак жойларда ибодат файзи билан юрган ҳожиларнинг саломи ва дуоларини етказди.
“Ҳожиларимиз шу қадар хурсандки, кўзларида ёш билан дуолар қиляпти. Шахсан ўзингиз бир неча марта инсон қадри, ҳожиларимиз қайси юртда бўлса ҳам, ҳурмати, қадри билан бўлсин, деган топшириғингиз асосида меҳмонхоналарда ҳамма шароитлар яратилди. Куни кеча Саудия Арабистони Соғлиқни сақлаш вазирлиги ва мутасадди ташкилотлардан келиб, меҳмонхонада шифохонада қилганимизни кўриб, давлат раҳбарига минг раҳмат, бирор-бир давлатда бунақа нарса йўқ, деб, ўзлари хайрон қолиб кетишди.
Еттита меҳмонхона олган бўлсак, ҳар бирига мутасаддилар ажратилди. 24 соат транспорт қўйилган, бирорта ҳожимизда бошқа транспортга эҳтиёж йўқ. Ўзбекистон ёзуви билан ҳар бир жойда кузатувчилар билан олиб бориб, олиб келяпти. Ҳарамда ҳам ибодатга ҳамма шароит қилинган”, — дейди муфтий.
Ҳудудлардаги Ҳаж марказлари орқали ишлар уюшқоқлик билан олиб борилди. Вазирлар Маҳкамаси бошчилигида Дин ишлари бўйича қўмита, Ташқи ишлар вазирлиги, Транспорт вазирлиги, Соғлиқни сақлаш вазирлиги ва бошқа тузилмалар ҳамкорлигида зиёратчилар учун барча шароит яратилди.
Айни пайтда қарийб 12 минг нафар юртдошимиз Саудия Арабистонида бўлиб турибди. Жами 15 минг 130 нафар фуқаро ҳаж ибодатига муяссар бўлади. Уларга 300 нафар гуруҳ раҳбари, 50 нафар олий тоифали шифокор, ошпазлар, таржимонлар ва бошқа кўмакчилар ҳамроҳлик қилади.
Бу каби эътибор ва шароитларни арабистонлик мутасаддилар ҳам юқори баҳолаб, Ўзбекистон президентига ҳурмат ва дуоларини изҳор этмоқда.
Бу йилдан бошлаб бир янгилик — Саудия Арабистонида бўлиб турган диний соҳа ходимлари ҳамда қори зиёратчилар томонидан Қуръони каримни хатм қилиш йўлга қўйилди. Ҳозиргача 1 минг 515 та хатм ўқилиб, Ўзбекистонга тинчлик, халқимизга фаровонлик тилаб дуолар қилинган.
Давлат раҳбари юртдошларимиз муқаддас ҳаж ибодатини мукаммал адо этиб, соғ-омон келишларини тилади. Ўзбекистонга қайтгач, ҳожилар жамиятдаги меҳр-оқибат муҳитини мустаҳкамлаш, жаҳолатга қарши маърифат билан курашиш, ёшлар тарбияси ва оилалар тотувлигида ибрат бўлишларига умид билдирди.
Суҳбат самимий ва кўтаринки руҳда ўтди.
Изоҳ (0)