Исроил авиацияси 20 июль куни Ғазо сектори марказидаги Нусейрат қочқинлар лагерига зарба берган. Бу ҳақда CNN нашри хабар қилди.
Ғазо Соғлиқни сақлаш вазирлиги ва фуқаролик мудофааси ташкилоти Исроил ҳужумини тасдиқлаган. Исроил ҳарбийлари ҳужумдан олдин огоҳлантириш бермасдан кўплаб объектларни нишонга олган.
Дастлабки маълумотларга кўра, ҳужум оқибатида 13 киши ҳалок бўлган. Вайроналар остида яна кўплаб жасадлар қолиб кетгани тахмин қилинмоқда.
Исроил мудофаа кучлари матбуот бўлими ҳам ҳужум юзасидан баёнот берган. Тель-Авив расмийлари ҳужумда “хавфли террорчилар” йўқ қилинганини айтган.
“Исроил мудофаа кучлари Ғазо секторидаги террорчилар нишонларига, жумладан, Нусейрат ҳудудидаги инфратузилма объектларига зарба берди. Қуролли кучларимиз тинч аҳолига етказилиши мумкин бўлган зарарни юмшатиш учун катта саъй-ҳаракатларни амалга оширмоқда.
Фуқаролик инфратузилмаси ичида тизимли ва тажовузкор фаолият юритаётган Ғазо секторидаги ҲАМАС ва “Исломий жиҳод” террорчилик ташкилотларига қарши халқаро қонунларга мувофиқ ҳаракат қилинмоқда”, дейилган яҳудий ҳукуматига бўйсунувчи мудофаа кучлари ташкилоти баёнотида.
Нусейратдаги ҳужумга гувоҳ бўлганлар ҳаво зарбалари тобора аянчли тус ола бошлаганини билдирган. Аввалги ҳужумлардан фарқли равишда сўнгги зарбаларни Исроил армияси огоҳлантириш сигнали бермасдан амалга оширган.
“Вазият қўрқинчли. Ҳеч қандай огоҳлантириш йўқ, уйларга бомба ташланиши ҳақида сигналлар йўқ. Биз доимо яшириниб юрамиз, нима учун ва қачон уйларимизни портлатишларини билмаймиз”, деган қочқинлар лагеридаги ҳужумга гувоҳ бўлган 39 ёшли Раҳма Абу Ҳажжож.
Ғазо соғлиқни сақлаш вазирлиги маълумотларига кўра, 7 октябрдан бери анклав ҳудудида ҳалок бўлган фаластинликларнинг умумий сони 38 919 кишини ташкил этган. 89 622 киши жароҳат олган. Вазирлик тинч аҳоли ва ўлдирилган жангчилар ўртасида тафовутлар статистикасини аниқлай олмаган.
Изоҳ (0)