Ғазога денгиз орқали илк гуманитар ёрдам етиб келди

Гуманитар ёрдам юкланган Open Arms кемаси Ғазо сектори қирғоқларига етиб келди, дея хабар берди Euronews.

Биринчи ёрдам кемаси янги денгиз йўлаги бўйлаб Ғазо сектори қирғоқларига 15 март куни етиб келган. Бу АҚШ президенти Жо Байденнинг гуманитар ёрдам етказиб бериш учун денгиз йўлаги яратиш қароридан кейин Ғазога юборилган биринчи кемадир. Open Arms гуманитар ташкилотига кўра, бортда икки юз тонна озиқ-овқат бор. Кема Исроил ҳарбийлари ҳамроҳлигида етиб келган. 

БМТга кўра, Ғазо аҳолисининг тўртдан бир қисми тўйиб овқатланмасликдан азият чекмоқда. Ғазо аҳолисига ҳаво орқали ҳам ёрдам ташланмоқда. Бироқ гуманитар ташкилотлар денгиз ва ҳаво орқали зарурий юкларни етказиб бериш самарали эмаслигини айтиб, Исроилни ёрдам етказиш учун хавфсиз йўлаклар яратишга чақирмоқда.

Аввалроқ Пентагон гуманитар ёрдамни Ғазо сектори қирғоқлари яқинида йирик кемалардан кичик кемаларга қайта юклаш ёки аввал Ғазога ташиш учун Исроил ва Мисрга гуманитар юкларни етказиб бериш таклиф қилган эди. Исроил Ташқи ишлар вазирлиги ҳам бундай ҳаракатни қўллаб-қувватлашини билдирган.