Япония қишлоқ, ўрмон ва балиқ хўжалиги вазири Таку Это гуруч ҳақидаги баҳсли гапи ортидан лавозимидан кетиш учун ариза берди. Бош вазир Сигеру Исиба буни қабул қилди. Бу ҳақда Reuters хабар берди.
Таку Это мамлакатда гуруч нархи ошган бир пайтда “ҳеч қачон гуруч сотиб олмагани, унга доим совға қилишлари”ни айтганди. Бу баёнот жамоатчиликда кескин танқидга сабаб бўлди.
Мен бош вазир номига ариза ёздим. Ҳозир халқ гуруч нархининг қимматлигидан азият чекаётган бир пайтда масалага масъул вазирнинг бундай гапириши ноўриндир. Чин қалбимдан халқдан узр сўрайман, деган Таку Это.
Исиба унинг истеъфога чиқиш қарорини тушунишини билдирган. Япония аҳолиси рационининг асосий маҳсулоти гуруч ҳисобланади. Бироқ сўнгги ойларда эса ушбу маҳсулот нархи кескин ошиб, йил давомида деярли икки бараварга қимматлашди.
Нархларнинг кўтарилишига қарши курашиш мақсадида ҳукумат илк бор тинчлик даврида, табиий офатларсиз шароитда, давлат захираларидан гуруч сотишни бошлади. Аввалига бу чора вақтинчалик деб белгиланган эди. Бироқ нархлар ўсишда давом этгани сабабли ҳукумат ушбу дастурни июль ойигача узайтирди.
Танқислик 2024 йилнинг август ойида ҳукуматнинг йирик зилзилага тайёргарлик кўриш тўғрисидаги огоҳлантиришидан кейин ваҳимали харидлар туфайли бошланганди. Гарчи кузги ҳосилдан кейин таклиф босими камайган бўлса-да, 2025 йил бошларида тақчиллик ва нархлар ўсиши яна давом этди.
Расмийлар етказиб беришдаги узилишларни 2023 йилдаги аномал об-ҳаво натижасида ҳосил паст бўлгани, ўғитлар ва бошқа ишлаб чиқариш харажатлари ошгани билан изоҳлади. Бироқ айрим экспертлар бунга ҳукуматнинг гуруч етиштириш борасидаги узоқ муддатли сиёсатини сабаб қилиб кўрсатмоқда.
Изоҳ (0)