Япония бош вазири Фумио Кисида ва бир қанча вазирлар Фукусима АЭСдаги сув океанга тўкилгандан кейин тутилган балиқни омма олдида истеъмол қилди. Амалдорлар шу тариқа улар хавфсиз эканини кўрсатди. Бу ҳақда Nikkei хабар берди.
Япониянинг Tokyo Electric Power (ТEPCО) компанияси Фукусима-1 атом электр станциясидаги тозаланган радиоактив сувни океанга тўкишни бошлаган. Хитой мазкур жараён сабабли япон денгиз маҳсулотлари импортига тақиқ киритган.
Таъкидланишича, Фумио Кисида камбала, олабуға балиқлари, саккизоёқдан тайёрланган сашими (япон таоми), шунингдек, гуруч истеъмол қилган. Япония ҳукумати Фукусима яқинида овланган денгиз маҳсулотлари хавфсизлиги ҳақида “аҳоли ва хориждаги одамларни хабардор қилиш керак”лигини айтмоқда.
Бош вазир денгиз маҳсулотларини татиб кўраётгани акс этган видеода Кисида “мазали” деганини кўриш мумкин.
Хитой Япония денгиз маҳсулотларини импортини тақиқлади
Хитой Фукусима АЭСдаги тозаланган радиоактив сув океанга тўкилиши фонида Япониянинг барча денгиз маҳсулотлари импортини тақиқлади. Ташқи ишлар вазирлигининг таъкидлашича, Хитой сувни тўкиш қарорини “қатъий қоралайди” ва Япониядан “бу нотўғри ҳаракатни тўхтатишни” талаб қилади.
“Япония худбинлик туфайли ўз халқига ва бутун дунёга қўшимча зарар келтирмаслиги керак”, — дейилади ТИВ хабарида.
Хитой Фукусима АЭСдаги сувни океанга тўкишга қарши
2011 йилдаги зилзила ва сунами оқибатида юзага келган авариядан сўнг Фукусима АЭС ҳудудида шикастланган реакторларни совитишда фойдаланиладиган 1 000 дан ортиқ сув резервуарлари тўпланиб қолган, бу тахминан 1,3 миллион куб метр сувни ташкил этади. Япония расмийларига кўра, 2024 йил бошида барча резервуарлар тўлиб бўлади.
Уларда сақланадиган сув яхшилаб тозаланган, аммо унда ҳали ҳам водороднинг радиоактив изотопи — тритий бор, бу модда изсиз йўқолиб кетмайди. Япония ҳукумати бу сувни денгизга тўкиш зарурлигини айтиб, бу дунёнинг бошқа атом электр станцияларида ҳам одатий ҳол эканини таъкидламоқда.
Хитой АЭСдаги сувни океанга тўкишга қатъиян қарши. Хитой элчиси бу дастурни нотўғри деб атади ҳамда Япония дастурни тўхтатиб, биринчи навбатда қўшни давлатлар билан маслаҳатлашувлар ўтказиши кераклигини айтди. 4 июль куни Атом энергияси бўйича халқаро агентлик (МАGATE) раҳбари Рафаэл Grossи Японияга ташриф буюрди ва сувни океанга тўкиш қарорини маъқуллади. Унинг таъкидлашича, оқинди сув сифатига, балиқларга ва яқин атрофдаги манзилгоҳларга катта таъсир қилмайди.
Изоҳ (0)