Yaponiya qishloq, o‘rmon va baliq xo‘jaligi vaziri Taku Eto guruch haqidagi bahsli gapi ortidan lavozimidan ketish uchun ariza berdi. Bosh vazir Sigeru Isiba buni qabul qildi. Bu haqda Reuters xabar berdi.
Taku Eto mamlakatda guruch narxi oshgan bir paytda “hech qachon guruch sotib olmagani, unga doim sovg‘a qilishlari”ni aytgandi. Bu bayonot jamoatchilikda keskin tanqidga sabab bo‘ldi.
Men bosh vazir nomiga ariza yozdim. Hozir xalq guruch narxining qimmatligidan aziyat chekayotgan bir paytda masalaga mas’ul vazirning bunday gapirishi noo‘rindir. Chin qalbimdan xalqdan uzr so‘rayman, degan Taku Eto.
Isiba uning iste’foga chiqish qarorini tushunishini bildirgan. Yaponiya aholisi ratsionining asosiy mahsuloti guruch hisoblanadi. Biroq so‘nggi oylarda esa ushbu mahsulot narxi keskin oshib, yil davomida deyarli ikki baravarga qimmatlashdi.
Narxlarning ko‘tarilishiga qarshi kurashish maqsadida hukumat ilk bor tinchlik davrida, tabiiy ofatlarsiz sharoitda, davlat zaxiralaridan guruch sotishni boshladi. Avvaliga bu chora vaqtinchalik deb belgilangan edi. Biroq narxlar o‘sishda davom etgani sababli hukumat ushbu dasturni iyul oyigacha uzaytirdi.
Tanqislik 2024-yilning avgust oyida hukumatning yirik zilzilaga tayyorgarlik ko‘rish to‘g‘risidagi ogohlantirishidan keyin vahimali xaridlar tufayli boshlangandi. Garchi kuzgi hosildan keyin taklif bosimi kamaygan bo‘lsa-da, 2025-yil boshlarida taqchillik va narxlar o‘sishi yana davom etdi.
Rasmiylar yetkazib berishdagi uzilishlarni 2023-yildagi anomal ob-havo natijasida hosil past bo‘lgani, o‘g‘itlar va boshqa ishlab chiqarish xarajatlari oshgani bilan izohladi. Biroq ayrim ekspertlar bunga hukumatning guruch yetishtirish borasidagi uzoq muddatli siyosatini sabab qilib ko‘rsatmoqda.
Izoh (0)