Япония пойтахти Токио шаҳрида 2024 йилга оид бир нечта жиноятларни содир этганликда гумонланиб, 5 нафар ўзбекистонлик эркак ҳибсга олинди. Бу ҳақда Tokyo Reporter нашри хабар берди.
Маълумотларга кўра, 30 декабрь куни Шибуя районида 21 ёшли Ҳасанбой Дўсматов ва унинг шериклари уч нафар хорижлик фуқарога яқинлашган. Дўсматов улардан бирининг юзига тепиб, шериклари билан бирга 210 минг иена (тахминан 1400 доллар) қийматидаги ҳамён ва сумкаларни ўғирлаган.
Босқинчилик ва тан жароҳати етказиш айблови билан қўлга олинган Дўсматов терговчиларга: “Адвокатим келмагунча гапирмайман”, дея изоҳ беришдан бош тортган. Қолган тўрт гумонланувчи эса айбловларни рад этган.
Полиция маълумотларига кўра, ушбу беш кишидан тўрт нафари, жумладан, Дўсматов ҳам Японияда ноқонуний яшаб келган. У ва унинг ҳамроҳлари 2023 йил августидан бери Шибуя ҳамда Шинжуку каби гавжум ҳудудларда кўчада ухлаётган одамларни талон-торож қилган бўлиши мумкин.
Улар ўғирланган кредит карталари ёрдамида iPhone смартфонларини харид қилиб, уларни қайта сотиш орқали тахминан 8 миллион иена (55 минг доллардан ортиқ) фойда кўрганликда гумонланмоқда.
Дўсматов гуруҳнинг раҳбари бўлган. У Telegram орқали жиноятлар содир этилиши керак бўлган сана ва вақтларни хабар қилган, дейди полиция.
Изоҳ (0)