Руминия фуқароларининг бир қисми Европа тарафдори, сиёсатчи Никушор Даннинг президентлик сайловларидаги ғалабасидан норози бўлиб, паспортларини йўқ қила бошлади ва фуқаролигини ўзгартириш билан таҳдид қилди. Бу ҳақда ижтимоий тармоқлардаги лавҳаларга асосланиб, Russian Today телеканали хабар бермоқда.
“Паспортларини қирқиб ташлаб, инқилобга чақиришмоқда ва Россия ҳамда бошқа мамлакатлардан сиёсий бошпана сўрашмоқда — бу Руминия фуқароларининг президент сайлови натижаларига муносабати”, дейилади хабарда.
Таъкидланишича, маҳаллий ижтимоий тармоқларда “кўплаб руминлар сургун йўлига киришади” ва “барча руминликдан воз кечишади”. деган хабарлар пайдо бўлган. Баъзилар “мамлакатни сақлаб қололмадик”, деб афсусланиши билдирган.
Вазиятга сайловда иккинчи ўринни эгаллаган “Руминияликлар бирлашуви учун иттифоқ” (AUR) партияси раҳбари Жорже Симион изоҳ бериб, одамларни мамлакатда ўзгаришларга эришиш учун мухолифат партияларига қўшилишга ундаган.
“Мен сизларнинг йиғлаб, паспортларингизни қирқиб ташлаётганингиз ҳақидаги ташвишли лавҳаларни кўрдим. Йўқ, бизга паспортларимизни йитиш керак эмас, аксинча Руминия учун бутун қалбимиз билан курашишимиз лозим” дейди Жорже Симион.
Руминияда президент сайлови
18 май куни Руминияда президентлик сайловларининг иккинчи тури ўтказилди. Мамлакат Марказий сайлов комиссияси маълумотларига кўра, Никушор Дан 53,60 фоиз, Жорже Симион эса 46,40 фоиз овоз тўплади.
Симион мағлубиятини тан олган, бироқ овоз беришдан сал олдин Симион Франция президенти Эммануэл Макронни Руминия сайловларига тўғридан-тўғри аралашганликда айблади. Унинг айтишича, Франция элчиси раҳбарлар ва тадбиркорларни бошқа номзодни қўллаб-қувватлашга кўндириш учун бутун Руминия бўйлаб саёҳат қилган. Франция Ташқи ишлар вазирлиги бу айбловларни рад этди.
Изоҳ (0)