Бельгиялик актёр Жан-Клод Ван Дамм эксплуатация қилинаётгани маълум бўлган шахснинг жинсий хизматларидан фойдаланганликда айбланмоқда. У фоҳишаликка мажбурланган руминиялик 5 нафар қизнинг хизматидан фойдалангани таъкидланмоқда. Бу ҳақда Hotnews хабар бермоқда.
Жабрланувчилардан бирининг адвокати Руминиянинг Уюшган жиноятчилик ва терроризмга қарши кураш бошқармасига ариза топширган. Унда айтилишича, жиноятлар тахминан 10 йил олдин Франциянинг Канн шаҳрида содир этилган.
“Руминия прокуратурасининг Уюшган жиноятчилик ва терроризмга қарши кураш бошқармаси томонидан вояга етмаганлар ва одам савдосининг эҳтимолий тармоғи бўйича олиб борилаётган тергов иши болалигимиздаги машҳур юлдузлар билан ишларни фош этмоқда. Жан-Клод Ван Дамм ҳимоясиз аҳволда бўлган беш нафар руминиялик қизнинг жинсий хизматларидан бир вақтнинг ўзида фойдалангани билан айбланмоқда”, дейди адвокат Адриан Кукулис
Адвокатнинг таъкидлашича, бу тадбирларни ким ва қандай ташкил этганини аниқ кўрсатган гувоҳнинг кўрсатмалари билан маълумотлар тасдиқланади. Жан-Клод Ван Даммнинг ушбу саҳналардаги иштироки шубҳа остига олинмайди.
Маълум қилинишича, Ван Дамм учун қизларни танлаш билан EuroDemos нотижорат ташкилоти (ННТ) раҳбари ва Kasta Morrely моделлик агентлиги эгаси бўлган руминиялик тадбиркор Морель Боля шуғулланган. У 2022 йилда вояга етмаганлар савдоси иши бўйича асосий айбланувчига айланган. Иш ҳужжатларида қайд этилишича, 2000 йилдан 2016 йилгача бўлган даврда қизлар, шу жумладан вояга етмаганлар, ушбу ННТ ва моделлик агентлиги орқали “руҳий босим ўтказиш йўли билан жинсий эксплуатация” билан боғлиқ фаолиятга жалб этилган. Ҳозирги пайтда тергов ҳаракатлари давом этмоқда.
Изоҳ (0)