Farg‘ona, Namangan viloyatlari va Toshkent shahrida haj va umra ziyoratlarini noqonuniy tashkil etishga uringan shaxslar harakatlariga chek qo‘yildi.
Davlat xavfsizlik xizmatining Toshkent shahri bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda, Toshkent shahrida faoliyat yurituvchi turistik firmalardan birining 4 nafar xodimi 3 nafar fuqaroni ishchi vizasi orqali haj ziyoratiga yuborish evaziga 7 ming dollardan hamda 1 nafar fuqaroni sayyohlik vizasi orqali yuborish evaziga 5 ming dollar, jami 26 ming dollar talab qilib, oldindan 20 ming dollar olgan vaqtida ushlangan.
Xizmatning Farg‘ona viloyati bo‘yicha boshqarmasi hamda ichki ishlar organlari xodimlari hamkorligida o‘tkazilgan tezkor tadbirda esa Marg‘ilon shahrida faoliyat yurituvchi turistik firmaning ish yurituvchisi 2 nafar fuqaroni umra safariga yuborish evaziga 2400 dollar, shuningdek, 3 nafar fuqaroni haj ziyoratiga yuborish evaziga 15 ming dollar olgan vaqtida ashyoviy dalillar bilan ushlangan.
Xizmatning Namangan viloyati bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda, Namangan shahrida yashovchi, 1999-yilda tug‘ilgan shaxs 2025-yilda haj safariga yuborish bo‘yicha ijtimoiy tarmoqlarga soxta e’lonlar joylab, 3 nafar fuqaroning ishonchiga kirgan. Ularning har biridan 4900 dollar, jami 14 700 dollar olgan vaqtida ushlangan.
Chust tumanida faoliyat yurituvchi turistik firma rahbari esa umra ziyoratini tashkil etish uchun tegishli litsenziyaga ega bo‘lmay turib, 3 nafar fuqaroni 1350 dollardan, jami 4050 dollarga umra ziyoratiga yuborishini aytib, shundan 4 ming dollarni olgan vaqtida ashyoviy dalillar bilan ushlangan.
Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda esa Toshkent shahrida yashovchi, 1998-yilda tug‘ilgan shaxs poytaxtda faoliyat yurituvchi mas’uliyati cheklangan jamiyat orqali 5 nafar fuqaroni jami 27 ming dollar evaziga haj vizasi asosida diniy amallarni bajarish uchun Saudiya Arabistoniga yuborishni va’da qilib, oldindan 13 500 dollar olgan vaqtida ushlandi.
Hozirda mazkur holatlar yuzasidan barcha qonunbuzarlarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Haj va umra tadbirlarini tashkil etish
Haj ziyoratiga borish uchun ruxsatnoma olish talab etiladi. Har yili ajratilgan kvotalar asosida nomzodlar tasdiqlanadi. Tasdiqlangan nomzodlar safar hujjatlarini rasmiylashtiradi.
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilangan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatish taqiqlangan. Bunday huquqbuzarliklar uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)