Ўрта Осиё халқлари “Азон” вақфи васийлар кенгаши раиси, “Азон Глобал” ахборот-таҳлилий портали асосчиси Мубашшир Аҳмад (Алишер Турсунов) Истанбулда қўлга олинди.
“Азон Глобал” порталининг маълум қилинишича, у 2025 йил 8 май куни Истанбулнинг Баҳчешеҳир мавзесидаги уйидан гумонланувчи сифатида олиб кетилган. Шу куннинг ўзида адвокатлари иштирокида дастлабки суриштирув ўтказилган. Ўша куни адвокатларига билдирилган охирги маълумотга кўра, суриштирувдан сўнг Истанбулдаги Депортация марказига (Geri Gönderme Merkezi – GGM) ўтказилиши, 9 май, жума куни у ердан қўйиб юборилиши керак эди.
Аммо орадан тўрт кун ўтган бўлсада, Иммиграция бошқармаси (Göç İdaresi)) Мубашшир Аҳмаднинг қаердалиги, соғлиғи ва суд жараёни ҳақида адвокатларига ҳам, яқинларига ҳам ҳеч қандай маълумот бермаган.
Ваҳоланки, Туркия қонунчилигига кўра, назоратда ушлаб турилган шахснинг оиласига бу ҳақида маълумот берилиши, унинг ўзига ҳам яқинлари билан мулоқот қилишга изн этилиши белгилаб қўйилган.
“Бу борада қандайдир маълумот, янгилик бўлиши билан сизларни хабардор қиламиз. Бу орада урчиши мумкин бўлган ҳар қандай асоссиз хабарларга эътибор бермаслигингизни сўраймиз”, дейилади “Азон Глобал” хабарида.
2025 йилнинг февралида ИИВ Мубашшир Аҳмад қидирувга берилганини маълум қилганди. Тошкент шаҳар Шайхонтоҳур тумани ИИБ тергов бўлими томонидан 2023 йил 11 август куни унга нисбатан Жиноят кодексининг 244-3- моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш) билан жиноят иши қўзғатилган.
Изоҳ (0)