«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Бугун ўнлаб сайтлар, каналлар ва блогерлар ОАВ вазифасини бажармоқда. Аммо ўқувчиларнинг эътирофига энг муносиби қайси? «Sof.uz» сайти сўровнома ўтказиб, бунга ойдинлик киритди. Унда «Дарё» нашри тўртинчи ўринда қайд этилди. Сўровномада ўзбек тилида ахборот тарқатадиган сайтлар назарда тутилган. Биринчи ўринда «Kun.uz», иккинчи ўринда «Sof.uz», учинчи ўринда «Azon.uz» қайд этилди.
Хўш, энг яхши блогер ким? «Sof.uz» версиясига кўра, ҳуқуқшунос Хушнудбек Худойбердиев энг яхши блогердир. Иккинчи ўринда Нурбек Алимов, учинчида таниқли уламо Мубашшир Аҳмад туради. Айтиш лозимки, сўровномада ўзбекзабон блогерлар назарда тутилган. Табиийки, интернетдаги фаоллиги асосий мезондир. «Дарё» муҳаррирлари Элдор Асанов ва Муҳрим Аъзамхўжаев ҳам энг яхши блогерлар ўнлигидан жой олган.
Респондентлар энг яхши канал деб исломий билим улашувчи «Зикр аҳлидан сўранг» каналини тан олган. Иккинчида энг яхши блогер Хушнудбекнинг «Xushnudbek.uz», учинчида «Fayzbog.uz» каналларидир.
* * *
Россиянинг «Лукойл» компанияси ходими маҳаллий ишчиларни «баран» деб сўккани видеоси тарқалиб кетгач, интернет фойдаланувчилар жунбушга келди. Кейинроқ компания техника хавфсизлиги қоидалари қўпол бузилгани учун бу воқеа бўлгани ҳақида баёнот берган бўлса-да, унгача «Адолат», ХДП, ЎзЛиДеП ҳамда «Юксалиш» умуммиллий ҳаракати фурсатни бой бермай, билдирган муносабатида ҳақоратчи ходимни қоралаб чиқди.
«Лукойл» ўз ходими Иван Шилов ахлоқий қоидалардан четлашганини тан олган. Шу сабабли Иван Шилов «Лукойл»нинг Ишбилармонлик этикаси бўйича комиссиясининг Москвадаги йиғилишига чақирилган.
* * *
Шу йилнинг 21 октябрида Давлат тилини ривожлантириш департаменти ташкил қилинган эди. Давлат тилини ривожлантириш, давлат тили тўғрисидаги қонун ҳужжатларига риоя этилиши устидан мониторинг қилиш, соҳада жамоатчилик назоратининг самарали шаклларини жорий этиш департаментнинг асосий вазифаси саналади. Қисқа қилиб айтганда, ўзбек тилининг мавқеини юксалтиришга масъул саналган департаментга Абдугаппор Киргизбаев мудир этиб тайинланди.
* * *
Бу ҳафта тасодифий аудио ва видеоларга бой бўлди. Фарғонада чегарачилар бир ўсмирни бейсбол таёғи билан куппа-кундузи калтаклагани видеоси жамоатчилик тарафида қаҳр билан қаршиланди. Бу воқеа Фарғона тумани Водил қишлоғида юз берганлиги кейинчалик англашилди.
ДХХ чегара қўшинлари кейинроқ билдирган муносабатида ўсмир «чегарачиларнинг буйруғига бўйсунмагани», «чегарачиларни ҳақорат қилгани», «аввал ҳам ноқонуний буюм олиб ўтгани» иддао қилинган. Бироқ видеодаги ўсмир чегарачининг «тўхта» буйруғига тўхтаганининг ўзи бу даъволарни шубҳа остига олади.
* * *
Ширин печенье вафлидан йўллардаги тирбандликнинг олдини олишда фойдаланиш мумкинми? Мумкин экан. Тошкентда тирбандлик кўп юз берувчи чорраҳаларда сариқ ранглик катак тўртбурчак шаклидаги йўл чизиғи жорий этиляпти. Ҳаракат йўлагида тирбандлик ҳосил бўлган бўлса, ҳайдовчи чизма устида ҳаракатланмасдан тўхтайди ва орқадаги автомобилларни ҳам тўхташга мажбур қилади.
Чорраҳадаги тирбандлик нимадан чиқади? Маълумки, светофор ишлаганда, ҳатто ЙПҲ инспектори ҳаракатни бошқараётганда ҳам айрим шошқалоқ ҳайдовчилар ишорани кутмай «тезда ўтиб кетиш» учун чорраҳага тиқилади. Бу ҳолат эса чорраҳадан ўтаётган бошқа машиналарга муаммо туғдиради. Энди бирор-бир ҳайдовчи вафлисимон тўртбурчакнинг ичида қолиб кетиши мумкин эмас, тўхтамай бурилишига кўзи етсагина чорраҳага кириши шарт. «Вафли» ичида қолиб кетган ҳайдовчини яхшигина жарима кутади.
* * *
Урганчдаги фаолияти сабабли руҳий касаллар шифохонасига жойланган блогер Шабнам Оллошукурова юзасидан АОКА директори Комил Алламжоновга савол берилди. 12 ноябрь куни матбуот анжуманида журналист Жамшид Ниёзов доимий тарзда танқидий чиқишлар қилиб турган Шабнам Оллошукуровага руҳий бузилиш бўйича қўйилган ташхисни исталган одамга қўйиш эҳтимоли борлигига эътибор қаратиб, бундан кейин бошқаларга ҳам бундай ташхис қўйилмаслиги қай даражада кафолатлангани бўйича Алламжоновга савол берди. Алламжонов танқидчиларнинг ҳаммаси ҳам шу кўйга тушмаслиги ҳақида гапирди, Оллошукуровани фақат шу воқеа ортидан таниганини айтди, советлар давридаги нарсалар қайтмаётганини маълум қилди ва охирида «Бу ҳақиқий провокацион савол» деди.
Унинг саволга провокацион тус бериши журналистлар орасида қатор эътирозлар уйғотди.
* * *
Футбол бўйича ЖЧ—2022 саралаши иккинчи босқичи 5-тури доирасида Ўзбекистон терма жамоаси ўз майдонида Саудия Арабистони термасига қарши баҳс олиб борди. Аввалига ютаётган Ўзбекистон терма жамоаси кейинроқ ўз услубига қайтди ва 3:2 ҳисобида мағлубиятга учради. Мухлисларнинг ҳафсаласини пир қилган баҳсдан сўнг мураббий Вадим Абрамов «Натижа ёмон, аммо курашишда давом этамиз» деди. Араблар мураббийи эса уч ойдан бери тинмай шуғулланаётгани ҳақида гапирди.
* * *
Аслида бирор мансабдорнинг ҳақоратли аудиоси чиқиши катта янгилик бўлмай қолди. Халқ навбатдаги оддий ҳодисадек қабул қилмоқда, зотан ҳокимият тизимида ҳақоратлар ҳақиқатан оддий ҳолдир. Бироқ Ўзбекистон давлат тизимида бу меъёрга айланишини истамайдиган афкор омма бор эканки, оммавий ахборот воситалари кенг ёритмоқда ва жамоатчилик муҳокама қилмоқда.
Икки кун муқаддам ижтимоий тармоқларни Фарғонанинг «тили ширин» ҳокими Шуҳрат Ғаниевнинг фермернинг соқолини қириш ҳақидаги таҳдидли топшириғи портлатган бўлса, кеча Тошкент ҳокими Жаҳонгир Ортиқхўжаев улоқни илиб олди. Аудиода ҳокимбува ғазабини журналистларга йўналтирган. Уларни принципсизликда айблаган, ўғрилар жаргонида «бедолага», «петух» деган. Уларни гей деб эълон қилиш, маҳалла-кўйда юролмайдиган қилиб қўйиш билан таҳдид қилган. Умуман «йўқолиб қолиши» мумкинлигини эслатган.
«Адолат» социал-демократик партияси Тошкент шаҳар ҳокими Жаҳонгир Ортиқхўжаевга нисбатан қонунда белгиланган тартибда қатъий чора кўрилишини сўраб чиқди. АОКА эса журналистлар ҳимоячиси сифатида «Биз вазиятдан хабардормиз, тегишли чоралар кўрилмоқда», деди. ХДП Жаҳонгир Ортиқхўжаевнинг журналистларга таҳдидини халқ ва давлатга ҳурматсизлик деб атади. «Миллий тикланиш» эса аудиоёзув ҳақиқийлиги исботланмагунча унга муносабат билдиришдан бош тортди.
«Дарё» янгиликларини кузатиб боринг. Ўзбекистон ва дунё хабарларидан энг биринчи воқиф бўлинг.
Изоҳ (0)