Блогерлар депутатнинг таклифига қарши. Германиядан бир масалада олдинда эканмиз. Ижтимоий тармоқлардаги трендлар

Ҳафтанинг биринчи ярмида ижтимоий тармоқда рўй берган асосий воқеалар билан навбатдаги дайжестимизда танишишингиз мумкин.

Ёш болали оналар четга чиқмасин...ми?

Халқ депутатлари Пискент тумани Кенгаши депутати Марҳабо Қурбонова Олий Мажлис Қонунчилик палатаси депутатлари ва Сенати аъзоларига вояга етмаган фарзандлари бўлган оналарнинг хорижга чиқишини чеклаш таклифини билдирди.

Бу таклиф тармоқда ҳайрат билан кутиб олинди, дейлик, пост ва изоҳлар тахминан мана бундай кўринишда:

Бу мавзу ҳақида фикр сўраб ўзбек блогерларига муроожаат қилдик. Демак, янги рукнимиз — «Блогер фикри».

Бу, аввало, инсон ҳуқуқларига зид. Қолаверса, муаммонинг ечими эмас, балки янги муаммоларнинг боши бўлади. Умуман, охирги пайтларда эпатаж таклифлар билан оғизга тушиш урф бўляпти. Биров амма-ю тоғаваччалар орасида никоҳни тақиқлаш таклифи билан, яна биров аёлларни юрт қамоғига тиқиш таклифи билан оғизга тушяпти. Бу таклиф ўтмаслигини билишади, аммо уларни ҳамма таниб олади. Худди журналистларга қасам ичиришни таклиф қилган журнал бош муҳарриридек.

Реал ишлар қилайлик ё жим ўтирайлик.

Шаҳноза Тўрахўжаева (Telegram’даги «Блогер Шаҳноза» канали)

Мен озод инсоннинг эркин ҳаракатланишини чекловчи ҳар қандай қоидаларга қаршиман. Халқимиз ўзи прописка, ОВИР деган чекловларда тўйиб бўлди. Вояга етмаган фарзанди бор аёлларнинг четга чиқишини қонун йўли билан чеклаш орқали муаммони ечиб бўлмайди. Депутатлар, аввало, ана шу муаммони юзага келтирган сабабларни бартараф этишни ўйлаши керак.

Давронбек Тожиалиев (Ўзбекистондаги энг катта онлайн кутубхона — «Ziyouz.com» сайти)

Таклифга қўшилмайман.

Дейлик, ушбу таклифни берган Марҳабо Қурбонованинг вояга етмаган фарзандлари бор. Конференцияга чақириб қолишди чет элга. Ёки ишбилармон аёл, ҳамкорлари билан учрашиши керак. Ёки даволангани кетмоқчи. Бундай сценарийларнинг миллионлаб шакли бор. Берилган таклиф барчасини инобатга олганмикан?

Негадир бизда нуқул шунақа. Ҳар қандай муаммонинг ечими - чеклов ёки жазо. Рационал ёндашув йўқ.

Умид Ғафуров (Telegram’даги «Troll.uz» канали асосчиси)

Бу масалага бир тарафлама ёндашиб бўлмайди. Ўзбекистон шароитида 3-4 ёш болани боқиш учун етарли ойлик тўловчи иш ўринлари кам,бўлса ҳам эгали. Нафақа тўловлари ҳам жуда кулгили аҳволда. Бу қарорни таклиф қилганлар ё вазиятни аниқ билишмайди, ёки биз ҳам ишлаяпмиз деган ғоя билан таклиф қилишган. Болаларни боғчага 3 ёшдан қабул қилиш ҳам қанча аёлларни қийнади ва қийнаб келмоқда. Депутатлар халқни қийнайдиган қарорларни таклиф қилишдан тийилсалар бўларди.

Абдулазизхон Акрамов (Telegram’даги @doridarmonlar канали асосчиси)

Муаммо борлиги рост. Аммо тақиқлаш орқали мақсадга эришиб бўлмайди. Қайтанга касал баттар газак олади. Муаммога ечим топиш учун унинг оқибати билан эмас, сабаблари билан курашиш керак аслида.

Жамшид Ниёзов (Telegram’даги Niyozov News канали асосчиси)

Мен бундай чекловларга мутлақо қаршиман. Бундай чекловлар халқ овора бўлиб қийналишига сабаб бўлса, иккинчи тарафдан халқаро майдонда обрўйимиз тушишига сабаб бўлади. Бундай чекловларни жорий қилиш эмас, айнан шунга ўхшаган бошқа чекловларни ҳам мутлақо йўқотиш керак. Чунки бундай чекловлар мамлакат тараққиётга хизмат қилмайди, аксинча, оёғимиздан чалади.

Ғайрат Йўлдош (Telegram’даги «Қизиқарли харита» асосчиси)

Facebook’нинг бир гуруҳига қўйилган видеоролик кўпчиликнинг ҳайратига сабаб бўлди. Унда Германиянинг оддийгина чекка бир жойларидан бирида сотувчисиз асал сотиш будкаси тасвирланган. Будкада 5-6 идишда асал бор, нархи ёзиб қўйилган, кимга керак бўлса, тагидаги махсус тешикка 5 евро ташлаб олиб кетаверар экан. Бу видеони кўриб, Германия биздан 70-80 йил «орқада» экан, деб ўйладим. Эсингизда бўлса, Абдулла Қаҳҳор «Ўтмишдан эртаклар» асарида яйпанлик новвой эрталаб нонларини кўчага қўйиб қўйишини, кимга нон керак бўлса, нонни олиб, сават устига пул қўйиб кетаверишини ёзган эди.

Ҳақиқатан, ўтмишдаги ота-боболаримиз мана шундай инсонлар бўлган. Видеони кўриб, балки бизда ҳам эксперимент қилиб кўриш керакмикан, деб қолдим шу борада. Ишонч иймоннинг асоси, дейилганку ахир, бир-биримизга ишонайлик.

Facebook’да кўтарилган бошқа мавзуларга қисқача тўхталамиз.

Мубашшир Аҳмад

Ажрашганимиздан бери қўнғироғини кутаман... жавоб бермаслик учун.

Абдуқодир Мўминов

Шундай қилиб, бу демократиями ёки баҳорнинг бошланишими. Нима дейсизлар, нимаси ўзига ярашипти бунинг?

Одам ажратиш деманг-у, шунақаларни кўрсам, «битта сатил-челак кийиб олмапти-да бошига» дегим келади.

Маълумот учун: бу каби юрувчилар илк маротаба Францияда пайдо бўлган. Яъни, никоҳсиз туғилган ва вояга етган ўсмирлар ўзини тасдиқловчи ҳужжат (паспорт) ололмагани (ундайларга берилмаган...) учун шу каби бир гала ёшлар тўдаси ўзининг шимларини ва кўйлакларини худди шундай йиртиб олиб, ҳар хил таранг-турунг, очиқ-сочиқ кийиниб, турли-туман бачкана бўяниб, ноодатий ҳаракатлар қилиб намойиш ўтказишган. Мақсади жамиятда никоҳсиз туғилганлар ҳам ҳамма қатори имкониятлардан фойдаланишга эриша олиши бўлган.

ПС: Шундай қилиб, мана қандай одамлар буни «мода» қилиб юборган, кимлардир буни кўзга ташланиб туриш учун шундай кийиниб юришни одат қилмоқда энди...

Мавлон Марасулов

Баъзида ўсишингга оғзинг халақит беради.

* * *

Facebook’нинг «Халқ билан мулоқот» гуруҳига қўйилган сурат ҳазил-мутойиба билан катта қизиқиш уйғотди. Белгини ўрнатганлар ноодатий тарзда ёндашгани улар мақсадига етишига хизмат қилиши аниқ, офарин, ғоя муаллифлари!

* * *

Эртага Халқаро-хотин қизлар байрами. Шу мавзуда Facebook фойдаланувчиларидан бири ўйга толдирувчи бир пости 600 га яқин лике тўплади.

Бобур Пайзибоев

Ҳамманики эмасми???? #8_март

Аёлларга эҳтиром уларнинг бойлиги, мавқеига қараб кўрсатилмаслиги керак!

Кўчаларимизни, шаҳримизни озода қилаётганлар, айнан улар кўпроғига лойиқ эмасми? Ҳаммамиз ухлаб ётган пайтимизда улар кўчаларимизни тозалаб қўйишади! Нега улар эътибордан четда қолишади ҳар доим?

Исроил Тиллабоев тайёрлади.