«Azon.uz» таъсисчиси Мубашшир Аҳмад Дин ишлари бўйича қўмитадан таҳдид бўлганлигини исботловчи далиллари борлигини маълум қилди

«Azon.uz» бош муҳаррири Дин ишлари бўйича қўмита томонидан таҳририятга нисбатан босим ўтказилгани ва сайтда эълон қилинган айрим мақолаларни ўчиришни талаб қилингани сабабли ишдан бўшаганини эълон қилганди. Дин ишлари бўйича қўмита бу хабарни рад этиб, бу борада қўмита раҳбарияти томонидан ҳеч қандай топшириқ бўлмаганини билдирганди.

Ушбу баёнотга жавобан «Azon.uz» унинг таъсисчиси Мубашшир Аҳмадга унга алоқадор бўлмаган, ахборот ресурсларида эълон қилинган мақолалар юзасидан Дин ишлари бўйича қўмита раиси ўринбосари Дилшод Эшнаевнинг ҳақоратли сўзлар билан таҳдид қилгани акс этган телефон суҳбати ёзиб олингани ва қўнғироқ вақти ва давомийлиги сақлаб қўйилганини маълум қилди.

Хабарда айтилишича, ҳақиқатда содир бўлган ушбу ҳолат юзасидан хабар бермасликка қарор қилинган бўлган. Аммо Дин ишлари бўйича қўмитанинг 4 февралда «Azon.uz» бош муҳаррири Абдулазиз Муборакнинг баёнотида келтирилган воқеалар бўлмаганлиги айтиб ўтилган муносабатидан сўнг, шунингдек, унинг таъсисчиси Мубашшир Аҳмаднинг Facebook’да онлайн эфир орқали чиқишларини инобатга олиб юқоридагиларни ошкор қилишга қарор қилинган.

Шу сабабли «Azon.uz» Дин ишлари бўйича қўмитадан Дилшод Эшнаев ҳаракатларига баҳо беришни ва бу ҳақда жамоатчиликни хабардор қилишни сўраган.

Хабарда, шунингдек, «Azon.uz»сайтининг бош муҳаррири Абдулазиз Раимовнинг таҳририятга нисбатан босим ўтказилгани сабабли эгаллаб турган лавозимидан озод этиш бўйича берган аризаси қаноатлантирилмагани ҳам билдириб ўтилган.