O‘rta Osiyo xalqlari “Azon” vaqfi vasiylar kengashi raisi, “Azon Global” axborot-tahliliy portali asoschisi Mubashshir Ahmad (Alisher Tursunov) Istanbulda qo‘lga olindi.
“Azon Global” portalining ma’lum qilinishicha, u 2025-yil 8-may kuni Istanbulning Bahcheshehir mavzesidagi uyidan gumonlanuvchi sifatida olib ketilgan. Shu kunning o‘zida advokatlari ishtirokida dastlabki surishtiruv o‘tkazilgan. O‘sha kuni advokatlariga bildirilgan oxirgi ma’lumotga ko‘ra, surishtiruvdan so‘ng Istanbuldagi Deportatsiya markaziga (Geri Gönderme Merkezi – GGM) o‘tkazilishi, 9-may, juma kuni u yerdan qo‘yib yuborilishi kerak edi.
Ammo oradan to‘rt kun o‘tgan bo‘lsa-da, Immigratsiya boshqarmasi (Göç İdaresi) Mubashshir Ahmadning qayerdaligi, sog‘lig‘i va sud jarayoni haqida advokatlariga ham, yaqinlariga ham hech qanday ma’lumot bermagan.
Vaholanki, Turkiya qonunchiligiga ko‘ra, nazoratda ushlab turilgan shaxsning oilasiga bu haqida ma’lumot berilishi, uning o‘ziga ham yaqinlari bilan muloqot qilishga izn etilishi belgilab qo‘yilgan.
“Bu borada qandaydir ma’lumot, yangilik bo‘lishi bilan sizlarni xabardor qilamiz. Bu orada urchishi mumkin bo‘lgan har qanday asossiz xabarlarga e’tibor bermasligingizni so‘raymiz”, deyiladi “Azon Global” xabarida.
2025-yilning fevralida IIV Mubashshir Ahmad qidiruvga berilganini ma’lum qilgandi. Toshkent shahar Shayxontohur tumani IIB tergov bo‘limi tomonidan 2023-yil 11-avgust kuni unga nisbatan Jinoyat kodeksining 244-3- moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) bilan jinoyat ishi qo‘zg‘atilgan.
Izoh (0)