«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Табиат яна юртимизни кучли ёмғир билан сийлади. Бу ёмғирдан эсдалик сифатида Тошкент аэропортининг «аквапорт»га айлангани фотосурат ва видеолари қолди. Ислом Каримов номидаги аэропортнинг учиб келиш зали ва терминал яқинидаги объектларни сув босганини бутун мамлакат аҳли кўриб, қурувчилардан ҳафсаласи пир бўлди.
Аэропорт ходими дренаж тизими сувга тўлиб қолгани билан ҳолатни изоҳлашдан нарига ўтмади. Ёмғир фақат аэропортни эмас, бутун Тошкентни сувга чўмилтиргани видеолари тарқалди. «Оби раҳмат»дан самарқандликлар ва бешариқликлар ҳам бенасиб қолгани йўқ: бу ерларда ҳам кучли сел ва жала қуйди.
* * *
Ўзбекистон президентининг биргина фотосурати уни халққа жуда яқинлаштириб юборди. Ахборот ва оммавий коммуникациялар агентлиги директори ўринбосари Саида Мирзиёева ижтимоий тармоқдаги саҳифасида отасининг оддий ўчоқда ош пишираётган суратини чоп этди. Шавкат Мирзиёев уй кийимида, оёғида эса кроссовка. Ушбу пост минглаб марта улашилди, юзлаб изоҳлар ёзилди. Хусусан, тармоқ аъзоларидан бирининг «Президентимизнинг уйида ҳам газ йўқ экан» деган ҳазил изоҳи бошқалар томонидан табассум билан қарши олинди. Шавкат Мирзиёев кийган италянча кўкиш кроссовка эса бирдан машҳур бўлиб кетди.
* * *
Ўтган ойлар ичида депутатлар ва кўплаб фуқаролар кундузи автомобиль чироғини ёқиб юриши лозимлиги ҳақидаги қоидани бекор қилишни сўраб ҳукуматга мурожаат қилганди. Ушбу ҳаракатлар ўз мевасини бериб, Ўзбекистонда автомобиль чироқларини ёқиб юриш бўйича талаб икки йилга узайтирилди. Энди фаралар бўйича талаб ҳайдовчига эмас, машина ишлаб чиқарувчига қўйилади. 2021 йилнинг 1 январигача автоматик ёнувчи кундузги чироғи бор машиналаргина фарасини ёқиб юради, бошқаларга бу қоида татбиқ этилмайди. Шунингдек, қоидабузарлар учун жарима миқдори ҳам камайтирилади.
* * *
Ушбу ҳафта юртимизда мусулмон оламининг муқаддас байрами – Рамазон ҳайити нишонланди. Ой кўриш орқали ҳайит кунини белгилаш бу йил ҳам кичик тортишувларни келтириб чиқарди. Таниқли уламо Мубашшир Аҳмад «Муфтийнинг сўзи ҳал қилувчи», дея юртимиз мусулмонларини ихтилофлашмасликка чорлади. Бу борада марҳум Шайх Муҳаммад Содиқ Муҳаммад Юсуфнинг фикрлари видеоси эълон қилинди. Шундай қилиб, 5 июнь куни саҳарлаб мусулмонлар ҳайит намозини адо қилди. Вилоятларда ҳайит муносабати билан турли эҳсонлар уюштирилди, таксилар бепул хизмат қилди.
* * *
Миллиардер Алишер Усмонов Наманганда 18 қаватли бизнес-марказ қуради. Бизнес-марказ конгресс залига эга, жаҳон талабларига жавоб берадиган бўлади. Кейинги халқаро инвестиция форумлари шу марказда ўтади. Асли чустлик миллиардернинг «осмонўпар»и юртимизда бизнесни ривожлантиришга эътибор сифатида талқин этилмоқда.
* * *
Бироз унутилган мегаош пишириш удуми бу сафар сирдарёликлар томонидан эсланди. 8 июнь куни гулистонлик паловпазлар 5 тоннали улкан ош пишириб аҳолига бепул тарқатди. Аммо 2017 йил сентябрида мегапалов тарқатилишида ҳам навбатни кўнгилдагидек ташкил этилмагани бу сафар ҳам ёдга тушди. Чунки сирдарёлик ош ишқибозлари тартибли навбат ташкил эта олмади. Тартибсизлик видеолари турли каналларда тарқалиб, танқидларга сабаб бўлди.
* * *
Манбаси келтирилмаган хабарларга кўра, юртимизда АЭС қурилиши масаласида депсиниш кузатилмоқда. Гарчи қурилишга масъул расмийлар ва бошқа мутахассислар АЭСнинг хавфсиз ва фойдали ток манбаи эканини таъкидлаётган бўлса-да, сўлим Жиззах вилоятида қурилиши режалаштирилаётган атом электр станцияси жуда кўплаб фаолларнинг хавотирига сабаб бўлди. Айтиш лозимки, бу хавотирларга АҚШ киноижодкорлари ишлаган «Чернобил» фильми яхшигина туртки берди (ушбу сериалга «Дарё» колумнисти Эльдар Асановнинг тақризини ўқинг). Ўнга яқин блогер АЭС хавотири юзасидан ўз блогида мулоҳазаларини чоп этди. Асосий хавотирлар АЭСнинг экологик хавфи, тинчликка таҳдиди, шунингдек, сиёсий воситага айланмаслиги юзасидандир.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)