Ижтимоий тармоқларда Ўзбекистон мусулмонлари идорасига янги муфтий тайинлангани ҳақида хабарлар тарқалди. Бу ҳолатга нисбатан идора расмий муносабат билдирди.
Маълум қилинишича, 2020 йил 8 август куни ижтимоий тармоқларда тарқалган Ўзбекистон мусулмонлари идораси раиси, муфтий лавозимига гўёки номзодлар кўриб чиқилиб, Azon.uz сайти таъсисчиси Мубашшир Аҳмад маъқулланди, деган мазмундаги хабар сохта ва мутлақо ҳақиқатга тўғри келмайди.
Мазкур асоссиз хабар тарқалган заҳотиёқ, Azon.uz таҳририяти ушбу хабар нотўғри экани, унга кўр-кўрона ишониб кетмасликка чақириб, раддия эълон қилган.
Таъкидланишича, Ўзбекистон мусулмонлари идораси раиси, муфтий лавозимида Усмонхон Алимов фаолиятларини давом эттирмоқда.
«Аҳоли орасида асоссиз ва ёлғон хабар тарқатиш Ислом дини таълимотларига кўра, қаттиқ қораланади, қонунчиликда эса жавобгарликка тортилишини эслатиб ўтамиз.
Ўз навбатида мўмин-мусулмонларни мана шундай фитна ва иккиланишларга сабаб бўладиган ёлғон хабарларни тарқатмасликка чақирамиз. Аллоҳ таоло барчамизни тўғри йўлда собитқадам қилсин!», – дейилади идора хабарида.
Изоҳ (0)